ސަރުކާރު ހިނގާ ޕީއެންސީއަށް ވަގު ފޯމް ފުރައިގެން މީހުން ވައްދާ މައްސަލަ ބޮޑުވެފައިވަނިކޮށް، ކުރީގެ މިނިސްޓަރު މުހައްމަދު މަލީހު ޖަމާލުގެ އަންހެނުންނަށް ނޭނގި ޕީއެންސީއަށް ވައްދާފައިވާކަން ހާމަވެއްޖެ އެވެ.

މިކަމާއި ގުޅިގެން އެކްސްގައި ކުރެއްވި ޕޯސްޓެއްގައި މަލީހު ވިދާޅުވީ އަންހެނުންވެސް ނޭނގި "ގަރުދިޔަ" ޕާޓީއަށް ވައްދާފައިވާ ކަމަށެވެ. މީގެ އިތުރުން މަލީހު ވިދާޅުވީ އިނގިލީގެ ނިޝާނާއި ސޮއި ފޯޖްކުރުމަކީ ގާނޫނީ ކުށެއް ކަމަށް ވެސް އޭނާ ވިދާޅުވި އެވެ.

މަލީހު ވަނީ ރައީސް މުއިއްޒު ކުރައްވާ ވައްކަން ބަލާނެ ފަރާތެއް ނެތީތޯ ސުވާލުކުރައްވާފަ އެވެ.

"އެހެންތާވާނީ ހޯމް މިނިސްޓަރު އިހުސާނުގެ ބެލުމުގެ ދަށުން މިކަންދާކަން ހެކިކޮށްދޭ ފޮޓޯ ދައުރު އެބަވޭ،" މަލީހު ވިދާޅުވި އެވެ.

މަލީހު މިހެން ވިދާޅުވެފައިވަނީ ހޯމް މިނިސްޓްރީގެ ދަށުން ހިންގާ ޑީއެންއާރް ތެރޭގައި ޕީއެންސީއަށް ފޯމް ފުރަން ބަޔަކު ތިބި ފޮޓޯތަކެއް އާއްމުވި މައްސަލައާ ގުޅިގެންނެވެ. އެފަހަރު ސޯޝަލް މީޑިއާގައި އާއްމުވި ފޮޓޯތަކުގައި ދެތިން މީހުން ވެގެން ލިސްޓްތަކެއް ބަލައިގެން ފޯމް ފުރަމުންދިޔައިރު، އޭގެ ތެރެއިން ބައެއް މީހުންގެ އަތުގެ ހުރިހާ އިނގިލިން އިނގިލީގެ ނިޝާން ޖަހާފައިވާކަން ފެންނަން ހުއްޓެވެ.

އެ ފޮޓޯތަކަށްފަހު ހޯމް މިނިސްޓްރީގެ ފަރާތުންކަމަށް ބުނެ ހޯމް މިނިސްޓަރު އިހުސާން އަލީ ގިނަ އަދަދެއްގެ ފޯމް ޕީއެންސީއާ ހަވާލުކުރެއްވުމުން ގިނަ ބައެއްގެ ފާޑުކިޔުމާއި ތުހުމަތުގެ އިނގިލި އިހުސާންއަށް އަމާޒުވި އެވެ.

ސިޔާސީ ޕާޓީތަކަށް އަންނަ އަހަރު ދޭނެ ބަޖެޓް ކަނޑައެޅުމަށް ހަމަޖެހިފައި އޮންނަނީ އިލެކްޝަނުން ކަނޑައަޅާ ދުވަހެއްގެ ކުރިން ޕާޓީތަކާއި ގުޅި ހުށަހަޅާ ފޯމްތަކަށް ބަލައިގެނެވެ. އެހެންކަމުން ޕީއެންސީން ވަނީ ދާދިފަހުން ގިނަ އަދަދެއްގެ ފޯމް އިލެކްޝަން ކޮމިޝަނަށް ހުށަހަޅާފަ އެވެ.

މަލީހު އަންހެނުން ނޭނގި ޕީއެންސީއަށް ވައްދާފައިވާއިރު، މިދިޔަ ހަފްތާގައި ވަނީ މަނަދޫ ދާއިރާގެ ކުރީގެ މެންބަރު އަދި އެމްޑީޕީގެ މަނަދޫ ދާއިރާ ރައީސް މުހައްމަދު ތޯރިގްގެ ނަމުގައި ޕީއެންސީއަށް ފޯމް ހުށަހަޅާފައިވާ މައްސަލައެއް ފުލުހަށް ހުށަހަޅާފަ އެވެ.