އަތޮޅުތަކުގައި ވެމްކޯގެ ބިލް ކަރަންޓް ބިލާއެއްކޮށްލަން ނިންމުމަށްފަހު، އެފަދައިން އަމަލުނުކުރަން ވެމްކޯއިން ނިންމައިފި އެވެ.

ވެމްކޯގެ ހިދުމަތް ދެމުން އަންނަ އަތޮޅުތަކުގެ ރަށްތަކުގެ ކުނީގެ ހިދުމަތުގެ ބިލް ކަރަންޓް ބިލުގައި ހިމެނުމަށްފަހު ޖެނުއަރީ މަހުން ފެށިގެން ފޮނުވާގޮތަށް ނިންމީ މިދިޔަ ޑިސެމްބަރު މަހުގެ ތެރޭގަ އެވެ.

ވެކްކޯއިން މިރޭ އާންމުކުރި ހާއްސަ ދެންނެވުމެއްގައި ވަނީ އެގޮތަށް ނިންމީ ރައީސް ޑރ. މުހައްމަދު މުއިއްޒުގެ ލަފާފުޅުގެ މަތިން ކަމަށެވެ.

"2025 ޖެނުއަރީން ފެށިގެން ވެމްކޯއިން އަތޮޅުތެރޭގެ ރަށްރަށުގައި ފޯރުކޮށްދޭ ގޭބިސީތަކުން ކުނި ނަގައި ދިނުމުގެ ހިދުމަތުގެ ބިލް ޔުޓިލިޓީ އެހެން ހިދުމަތެއްގެ ބިލުގައި ހިމެނުމަށް ނިންމި ނިންމުން ދިވެހިރާއްޖޭގެ އިއްޒަތްތެރި ރައީސުލްޖުމްހޫރިއްޔާ ޑޮކްޓަރު މުހައްމަދު މުއިއްޒުގެ ލަފާފުޅުގެމަތިން ބާތިލްކުރެވިފައިވާ ވާހަކަ ދަންނަވަމެވެ،" ވެމްކޯގެ ހާއްސަ ދެންނެވުމުގައިވެ އެވެ.

ވެމްކޯގެ ބިލްތަކަށް ފައިސާ ދެއްކުން އަތޮޅުތެރޭގައި ގާއިމްކޮށްފައިވާ އޮފީސްތަކުންނާއި ވެމްކޯގެ އަވަސް ޕޭ ޕޯޓަލް މެދުވެރިކޮށް އިމްތިޒާމްކުރެވިފައިވާ ކަމަށް ވެސް އެ ކުންފުނިން ބުންޏެވެ.

އަތޮޅުތަކުގައި ވެމްކޯގެ ބިލް ވަކިން ފޮނުވިޔަސް، މާލޭގައި ވެމްކޯގެ ބިލް ސްޓެލްކޯއިން ފޮނުވާ ކަރަންޓް ބިލާއެއްކޮށްލަ އެވެ. އެއީ ނިމިދިޔަ ރައީސް އިބްރާހީމް މުހައްމަދު ސޯލިހުގެ ސަރުކާރުގެ ނިންމުމެކެވެ.

ރައީސް ސޯލިހުގެ ސަރުކާރުން އެފަދައިން ނިންމީ ގިނަ އަދަދެެއްގެ ގޭބިސީތަކުން ކުނީގެ ބިލް ދައްކަމުން ނުދާތީ ވެމްކޯއަށް މާލީގޮތުން ގެއްލުންތަކެއް ވަމުންދާތީ އެވެ.