އެމެރިކާގެ ކެލިފޯނިއާ ސްޓޭޓްގައި ރޯވެ އަނދަމުންދާ ބޮޑެތި އަލިފާންގަނޑުތަކުގެ ސަބަބުން މިހާތަނަށް ދިހަ މީހުން މަރުވެ، 5،000 އަށް ވުރެ ގިނަ އިމާރާތް އަނދައި އަޅިއަށް ވެއްޖެ އެވެ.

އެމެރިކާ އޮފިޝަލުންނާ ހަވާލާދީ ރޮއިޓާސް ބުނި ގޮތުގައި ކެލިފޯނިއާ ސްޓޭޓްގެ ޖަންގަލިތަކުގެ އެކި ސަރަހައްދުތަކުގައި ތިން އަލިފާންގަނޑެއް، މިހާރު ވެސް ކޮންޓްރޯލް ނުވެ އަނދަމުން އެބަ ދެ އެވެ. އެ އަލިފާންގަނޑުތައް މީހުން ދިރިއުޅޭ ސަރަހައްދުތަކަށް ފެތުރިފައިވާއިރު އެންމެ ބޮޑު ގެއްލުމެއް ލިބެމުންދާ ކަމަށް ރިޕޯޓްކޮށްފައި ވަނީ ލޮސްއެންޖަލިސްއިންނެވެ.

އެ ޝަހަރުން 153،0000 އަށް ވުރެ ގިނަ މީހުން ގެދޮރު ދޫކޮށް ދާން ޖެހިފައި ވާއިރު އޭގެ ތެރޭގައި ހޮލީވުޑް ސެލެބްރިޓީން ވެސް ހިމެނެ އެވެ.

ކެލިފޯނިއާގައި ރޯވެ އަނދަމުންދާ އަލިފާންގަނޑުތަކުގެ ސަބަބުން، ވިޔަފާރިތަކާއި ގެތައް ހިމެނޭ ގޮތުން ޖުމްލަ 1.5 މިލިޔަން ތަނަކުން ކަރަންޓް ކެނޑިފައިވާ ކަމަށް ވެސް ރިޕޯޓްތައް ބުންޏެވެ.

އެމެރިކާގެ އިދާރާތަކުން ބުނާ ގޮތުގައި މިހާރު އަނދަމުންދާ އަލިފާންގަނޑުތަކަކީ މީގެ ކުރިން ދުވަހަކު ވެސް ރޯނުވާހާ ވަރުގަދަ އަލިފާންގަނޑުތަކެވެ. އަދި އެއިން އެއްވެސް އަލިފާންގަނޑެއްގެ އެންމެ ޕަސެންޓެއް ވެސް މިހައިތަނަށް ކޮންޓްރޯލްކުރެވިފައެއް ނުވެ އެވެ.

މި އަލިފާނުގެ ހާދިސާއިން ޖުމްލަ 36،000 އޭކަރ އަށްވުރެ ބޮޑު ބިން އަނދައިގެން ގޮސްފައިވާކަމަށް ސްޓޭޓްގެ ވައިލްޑް ފަޔަރ އޭޖެންސީ ކެލް ފަޔާ އިން ބުނެފައިވެ އެވެ.

އެންބީސީ ނިއުސް އިން ރިޕޯޓުކުރި ގޮތުގައި، ޖޭޕީ މޯގަންގެ އިންޝުއަރެންސް އިން ހެދި ދިރާސާއަކުން ދައްކާ ގޮތުގައި، މި އަލިފާނުގެ ސަބަބުން ލިބޭ ގެއްލުމުގެ އަގު 10 ބިލިއަން އެމެރިކާ ޑޮލަރަށް ވުރެ ބޮޑުވާނެ އެވެ.

ލޮސްއެންޖަލިސްގެ މޭޔަރު ކަރެން ބާސް، މީޑިއާތަކަށް ވިދާޅުވެފައިވާ ގޮތުގައި އަލިފާންގަނޑުތައް ވަރުގަދަވީ ހަނަފަސްކަން ބޮޑުވެފައިވުމާއެކު ވައިޖެހޭ މިންވަރު ގަދަކަމުންނެވެ.