ވައިކަރަދޫ ދާއިރާގެ މަޖިލިސް މެންބަރު ހުސައިން ޒިޔާދު (ފިއްޓޭ)ގެ ނަމުގައި ޕީއެންސީން ހުށަހެޅި ވަގު ފޯމް ޕްރޮސެސްކުރުމަށް ފަހު އިލެކްޝަން ކޮމިޝަނުން އަލުން އޭނާ އެމްޑީޕީއަށް ބަދަލުކޮށްފި އެވެ.

ރައްޔިތުންގެ މަޖިލީހުގެ މެންބަރުންނާއި ޖުޑިޝަރީއާއި ޕޮލިސް އެމްއެންޑީއެފް ފަދަ އިދާރާތަކުގައި މަސައްކަތް ކުރައްވާ ބޭފުޅުން ޕާޓީއަކަށް ވެއްދުމަށް އިލެކްޝަން ކޮމިޝަނަށް ފޯމު ހުށަހަޅައިފިނަމަ އެކަން އެލާޓް ވާނެކަމަށް އީސީން ބުނެފައިވަނިކޮށް އިދިކޮޅު އެމްޑީޕީގެ މަޖިލިސް މެންބަރަކު ޕީއެންސީއަށް ރަޖިސްޓްރީ ކުރިއިރުވެސް އީސީއަށް ނޭނގެ އެވެ.

އިލެކްޝަނުން ބުނީ މެންބަރު ޒިޔާދު އެމްޑީޕީން އުނިކުރި އިރު ނޭނގުނީ އެ ކޮމިޝަނުގެ އެލާޓް ސިސްޓަމަށް ދިމާވި މައްސަލައަކާއި ގުޅިގެން ކަމަށެވެ.

ވައިކަރަދޫ ދާއިރާގެ އިތުރު ބަޔަކާއެކު، ޒިޔާދުވެސް ޕީއެންސީއަށް ބަދަލުކޮށްފައިވާކަން އެނގުނީ މިއަދު އެވެ. މިކަމާއި ގުޅިގެން އެމްޑީޕީން ވަނީ މި މައްސަލަ ސީރިއަސް މައްސަލައެއްގެ ގޮތުގައި ބެލުމަށް ގޮވާލާފަ އެވެ.

ޒިޔާދު އަލުން އެމްޑީޕީއަށް ބަދަލުކޮށްފައި މިވަނީ، ރައްޔިތުންގެ މަޖިލީހުގެ މެންބަރަކު އިންތިހާބުވި ސިޔާސީ ޕާޓީ ބަދަލުކޮށްފި ނަމަ ނުވަތަ އެ ޕާޓީން ވަކި ކޮށްފިނަމަ މަޖިލިހުގެ މެންބަރުކަމުން ވަކިވާ ގޮތަށް ގާނޫނުއަސާސީ އަށް ގެންސްފައިވާ އިސްލާހާއި އެކު ޒިޔާދުގެ ގޮނޑި ގެއްލިދާނެ ކަމާމެދު ސުވާލު އުފެދިފައިވަނިކޮށެވެ.