ކުރީގެ ސަރުކާރުން ހިންގި "ގެދޮރުވެރިޔާ" ސްކީމުގެ ދަށުން ދޫކުރި 4000 ފްލެޓު ދޫކުރުން މި ސަރުކާރުން ލަސްކުރަމުންގޮސް އަނެއްކާވެސް އަލުން ފްލެޓް ލިބުނު މީހުންގެ ފޯމުތަކުގެ ސައްހަކަން ކަށަވަރު ކުރުމުގެ މަސައްކަތް ފަށާފައިވާ ކަމަށް ބުނެފި އެވެ.

މިއަދު ހައުސިން އެންޑް ކޮންސްޓްރަކްޝަން މިނިސްޓަރު އަބްދުﷲ މުއްތަލިބު ބޭއްވެވި ނޫސްވެރިންގެ ބައްދަލުވުމެއްގައި ވިދާޅުވީ ފްލެޓު ލިބުނު 4000 މީހުންގެ ފޯމުތައް ވެރިފައި ކުރަން ފަށާފައިވާ ކަމަށެވެ.

މުއްތަލިބު ވިދާޅުވީ ފޯމުތަކުގެ ސައްހަކަން ކަށަވަރު ކުރާނީ ފްލެޓު ދޫކުރާ އުސޫލާއި ގެދޮރުވެރިޔާ ޕޯޓަލްގައި ދީފައިވާ އިރުޝާދުތަކަށް އެކަނި ކަމަށެވެ. އެހެންކަމުން ފޯމުގައި ހުށަހަޅަން ބުނެފައިވާ ލިޔުންތައް ފިޔަވައި އިތުރު ލިޔުމެއް ހުށަހަޅާފައިވާ ނަމަ ފޯމު ވެރިފައި ކުރާއިރު އެ ލިޔުމަށް ނުބަލާނެ ކަމަށެވެ.

ލިސްޓުގެ ސައްހަކަން ކުރިއަށްގެންދާއިރު މާލޭގައި ދިރިއުޅޭ ކަމުގެ މުއްދަތަށް މެދުކެނޑުމެއް އައުން ބަޔާން ކޮށްފައި ނުވާތީ، އެ މެދުކެނޑުމަކީ އެއް އަހަރަށްވުރެ އިތުރު މުއްދަތަކަށް މެދުކެނޑުމެއް އައިސްފައިވާނަމަ ކަމަށް މުއްތަލިބު ވިދާޅުވި އެވެ.

މުއްތަލިބު ވިދާޅުވީ އެގޮތަށް ނިންމެވީ ވީހާވެސް ގިނަ ބަޔަކަށް ލިސްޓުން ފުރުސަތު ދިނުމުގެ ގޮތުން ކަމަށެވެ.

"މިދެންނެވި ކަންކަމަށް ރިއާއަތް ކުރަން ނިންމި މައިގަނޑު ސަބަބަކީ ވެރިފައި ކުރެވޭ ސަބަބަކާ ހެދި، މުއްދަތު ނުގުނާނަމަ އެމީހުންގެ ހައްގުތައް ގެއްލިގެންދިއުން. އެހެންކަމުން މިހާރު ކުރަން މިއުޅޭ މަސައްކަތަކީ ނޮވެމްބަރު 15، 2023 ގައި އިއުލާން ކުރެވުނު ފްލެޓް ލިބޭ 4،000 މީހުންގެ ލިސްޓު އޭސީސީ އާއި އޮޑިޓާ ޖެނެރަލް އޮފީހުން ދީފައިވާ ލަފަޔާ އެއްގޮތަށް އަދި ފޯމުލީ ބައެއް ފަރާތްތަކުގެ ކަންބޮޑުވުންތަކާ ގުޅިގެން ވެރިފައި ކުރުމަށް ކުރެވޭ މަސައްކަތެއް،" މުއްތަލިބު ވިދާޅުވި އެވެ.

މީގެ އިތުރުން އުސޫލާ ހިލާފަށް ދީފައިވާ ހުރިހާ ގޯއްޗަކާއި ފްލެޓެއް ސަރުކާރުން އަތުލާނެ ކަމަށް މިނިސްޓަރު ވިދާޅުވި އެވެ. އުސޫލާ ހިލާފަށް ގޯތި ދީފައިވޭތޯ ބަލަން ފަށާނީ ހުޅުމާލެ 2 އިން ދޫކޮށްފައިވާ ގޯތިތަކުން ކަމަށްވެސް އޭނާ ވިދާޅުވި އެވެ.

ގެދޮރުވެރިޔާ އަދި ބިންވެރިޔާ ސްކީމް މެދުވެރިކޮށް ވެސް އެކި ސްކޭމްތައް ހިންގާފައިވާކަން ފާހަގަކުރައްވާ މުއްތަލިބު ވިދާޅުވީއިއްޔެ

ހައުސިން މަޝްރޫއުތަކާ ގުޅިގެން ހިންގާ ސްކޭމްތަކުން ލިބޭ ގެއްލުންތަކުގެ ޒިންމާ ސަރުކާރުން ނުއުފުލާނެ ކަމަށެވެ.

ފްލެޓް ލިސްޓް އާންމުކުރުމަށް މި ސަރުކާރުން އެކި ތާރީހުތައް ދެމުންގޮސް، ރޯދައިގެ ކުރިން ލިސްޓް އާންމުކުރެވޭނެކަމަށް ރައީސް މުހައްމަދު މުއިއްޒުވަނީ ދާދިފަހުން ވިދާޅުވެފަ އެވެ.