ނޫސްވެރިޔާ އާއިދާ އަބްދުލްހަކީމްގެ ނަމުގައި އިލެކްޝަންސް ކޮމިޝަނަށް ހުށަހެޅި ޕީއެންސީގެ މެމްބާޝިޕް ފޯމްގައި ހެކިވެރިޔަކަށް މުހައްމަދު އިސްމާއީލް ސޮއިކޮށްފައިވާކަން ހާމަވެއްޖެ އެވެ.

އިލެކްޝަންސް ކޮމިޝަނުން އާއިދާއާ ހިއްސާކޮށްފައިވާ އެ ފޯމު އޭނާ ވަނީ ސޯޝަލް މީޑިއާގައި ހިއްސާކޮށްފަ އެވެ.

އެ ފޯމުގައި ހެކިވެރީންގެ ގޮތުގައި މުހައްމަދު އިސްމާއީލްގެ އިތުރުން ސޮއިކޮށްފައި ވަނީ މއ. ވާދީގެ، އަބްދުﷲ ޒިފާން ޒާހިދެވެ. އެ ދެ މީހުން ހެކިވެފައި ވަނީ އާއިދާ އެ މީހުންގެ ހާޒިރުގައި އެ ފޯމުގައި ސޮއިކުރި ކަމަށެވެ. ނަމަވެސް އާއިދާ ބުނެފައި ވަނީ ދުވަހަކު ވެސް ޕީއެންސީއަށް އޭނާ ސޮއިކޮށްފައިނުވާނެ ކަމަށެވެ.

ޕީއެންސީއަށް ވެއްދުމަށް ގިނަ އަދަދެއްގެ ވަގު ފޯމްތައް ހުށަހެޅިކަން ވަނީ ފަޅާއަރައިފަ އެވެ. އެމްޑީޕީގެ ގައުމީ މަޖިލީހުގެ ބައެއް މެމްބަރުންގެ އިތުރުން ވައިކަރަދޫ ދާއިރާގެ މެމްބަރު ހުސައިން ޒިޔާދު ވެސް ވަނީ ވަގަށް ޕީއެންސީއަށް ވައްދާފަ އެވެ.

ވަގު ފޯމު މައްސަލައިން ދިފާއު ނުވެވޭވަރުވުމުން ޕީއެންސީން މިއަދު ނެރުނު ބަޔާނެއްގައި ވަނީ ވަގު ފޯމްތައް އިލެކްޝަންސް ކޮމިޝަނަށް ހުށަހެޅި ކަމަށް އެއްބަސްވެފަ އެވެ. އެ ޕާޓީން ބުނީ އެ ފޯމްތަކުގެ ސައްހަކަން ކަށަވަރުކުރުމުގެ ގާބިލްކަން އެ ޕާޓީއަށް ލިބިފައިނުވާ ކަމަށެވެ.

ގިނަ އަދަދެއްގެ ވަގު ފޯމްތަކެއް ޕީއެންސީން ހުށަހަޅާފައި ވަނީ ރައީސް ޑރ. މުހައްމަދު މުއިއްޒުގެ އެންގެވުމަށް އެ ޕާޓީއަށް 100،000 މެމްބަރުން ހަމަކުރުމުގެ ގޮތުންނެވެ.