އެފްޓީއޭގެ ދަށުން ޒީރޯ ޓެރިފް މުދަލުގެ ފުރަތަމަ ބެޗް އެކްސްޕޯޓްކުރީ ގުއާންގްޝީއިން

މިމަހުގެ އެއްވަނަ ދުވަހު އަމަލުކުރަން ފެށި ޗައިނާ-މޯލްޑިވްސް ފްރީ ޓްރޭޑް އެގްރީމެންޓްގެ އެފްޓީއޭގެ ދަށުން ޒީރޯ ޓެރިފް މުދަލުގެ ފުރަތަމަ ބެޗް ޗައިނާގެ ގުއާންގްޝީއިން އެކްސްޕޯޓްކޮށްފި އެވެ.

ޗައިނާގެ ނޫހެއްގައި ބުނެފައި ވަނީ ދެކުނު ޗައިނާގެ ގުއާންގްޝީ ޒުއާންގް އޮޓޮނޮމަސް ރީޖަން އިން ރާއްޖެއަށް އެކްސްޕޯޓްކުރާ ބާވަތްތަކަށް ޗައިނާ-މޯލްޑިވްސް ފްރީ ޓްރޭޑް އެގްރީމެންޓްގެ ދަށުން، ޓެރިފް 15 ޕަސެންޓުން ސުމަކަށް ކުޑަކޮށްފައިވާ ކަމަށެވެ.

އެފްޓީއޭ އިން އެންމެ ފުރަތަމަ ފައިދާ ލިބުނީ ގުއާންގްޝީގެ ނަންނިން ޖިޗެންގޭންގް ކުންފުނީގެ 230،000 ޔުއާން (ގާތްގަނޑަކަށް 31،400 ޑޮލަރު) ގެ އަގުހުރި ސިސަލް ރޯޕް (ފައިބަރުން ހަދާ ނަނު ރޯލު) ތަކެއް އެކްސްޕޯޓްކޮށްގެންނެވެ. އާ އެއްބަސްވުމުގެ ދަށުން 35،000 ޔުއާން (ގާތްގަނޑަކަށް 4،770 އެމެރިކާ ޑޮލަރު) ގެ ގޮތުގައި 15 ޕަސެންޓްގެ ޓެރިފެއް އިސްތިސްނާވާނެ ކަމަށް ޗައިނާގެ ނޫހުގައި ބުނެފައިވެ އެވެ.

"ރާއްޖެއަކީ މިފަހަކަށް އައިސް އަޅުގަނޑުމެން ބެލި އާ މާކެޓެއް. މީގެ ކުރިން އަޅުގަނޑުމެންގެ ސިސަލް ރޮޕްސް ރާއްޖޭގައި ކަސްޓަމްސް ކްލިއާ ކުރިއިރު، އަޅުގަނޑުމެންގެ ކަސްޓަމަރުން ދައްކަން ޖެހުނީ 15 ޕަސެންޓް ޓެރިފް. މިހާރު ސެޓްފިކެޓް އޮފް އޮރިޖިންއާއެކު އަޅުގަނޑުމެންގެ ޕްރޮޑަކްޓްތަކަށް ޒީރޯ ޓެރިފް ޕޮލިސީގެ ފައިދާ ލިބިގެންދާނެ، އޭގެ ސަބަބުން 2025 ވަނަ އަހަރު ރާއްޖޭގެ މާކެޓުގައި ފުޅާކުރުމަށް ހިތްވަރު ލިބޭ،" ޖިޗެންގަންގް ކުންފުނީގެ ސޭލްސް މެނޭޖަރު މާ ޒޫކިން ވިދާޅުވި އެވެ.

ދެ ގައުމުގެ ކަސްޓަމްސް އިން ދަނީ އެކްސްޕޯޓް ކުރާ ކުންފުނިތަކުން ސެޓްފިކެޓް އޮފް އޮރިޖިންއަށް އެދި ހުށަހެޅުމުގެ ކަންކަން ވެސް ފަސޭހަކޮށްދެމުންނެވެ.

"ޔޮންގްޒޫ ކަސްޓަމްސް އިން އަންނަނީ އެންމެ ފަހުގެ ސިޔާސަތުތައް ތައާރަފްކޮށް ބުނެދިނުމުގެ އިތުރުން ކުންފުނިތަކަށް އިރުޝާދު ދެމުން. މީގެ އިތުރުން ސެޓްފިކެޓް އޮފް އޮރިޖިން އެޕްލިކޭޝަންތަކަށް ސްމާޓް ރިވިއު ޕްލަސް ސެލްފް ސާވިސް ޑޮކިއުމެންޓް ޕްރިންޓިން ސިސްޓަމް ވެސް ޕްރޮމޯޓް ކުރަމުން މިދަނީ ބޭރުގެ މާކެޓްތައް ވަނުމަށް ފުރުސަތު ކުންފުނިތަކަށް ހިފުމަށް އެހީތެރިވުމުގެ ގޮތުން،" ނަންނިންގައި ހުންނަ ޔޮންގްޒޫ ކަސްޓަމްސްގެ ކޮމްޕްރިހެންސިވް ބިޒްނަސް އޮފީހުގެ ޑެޕިއުޓީ ހެޑް ލިއު ހާއޯ ވިދާޅުވި އެވެ.

ޖެނުއަރީ 1، އިން ފެށިގެން ޗައިނާ-މޯލްޑިވްސް ފްރީ ޓްރޭޑް އެގްރީމަންޓް (އެފްޓީއޭ) ގެ ދަށުން ދެ ގައުމުގެ ދެމެދުގައި ވިޔަފާރި ކުރާ އުފެއްދުންތަކުގެ 95 ޕަސެންޓަށް ވުރެ ގިނަ ބާވަތްތަކުން ނަގާ ޓެރިފް މައާފްކުރެވެ އެވެ. މިގޮތުން ޗައިނާގެ ސިނާއީ އުފެއްދުންތަކާއި ދަނޑުވެރިކަމުގެ ގިނަ ބާވަތްތަކުގެ އިތުރުން ރާއްޖޭގެ ކަނޑުގެ އުފެއްދުންތަކާއި ޓެކްސްޓައިލް މާފުކުރާ ބާވަތްތަކުގެ ތެރޭގައި ހިމެނެ އެވެ. ސެޓްފިކެޓް އޮފް އޮރިޖިންއާއެކު ވިޔަފާރިތަކަށް ޓެރިފް ލުއިތަކުގެ ބޭނުން ހިފޭނެ ކަމަށް އެ ނޫހުގައި ބުނެފައިވެ އެވެ.

އެފްޓީއޭއާއެކު ރާއްޖެއަށް އެންމެ ގިނަ މުދާ އިމްޕޯޓްކުރާ ގައުމުން ގެންނަ ވަރަށް ގިނަ ބާވަތްތަކަށް ޑިއުޓީ މައާފްވާނެ އެވެ. މިއާއެކު ކަސްޓަމްސްްއަށް ޑިއުޓީގެ ގޮތުގައި ލިބޭ އާމްދަނީ ދަށްވާނެ އެވެ.