ގެދޮރު ގެއްލިފައިވާ މީހުން ބޯހިޔާވަހިކަން ހޯދަމުން ދިޔަ ޣައްޒާގެ ސްކޫލަށް އިޒްރޭލުން ދިން ހަމަލާ އާއި ދިވެހި ސަރުކާރުން ހަރުކަށި އިބާރާތުން ކުށްވެރިކޮށްފި އެވެ.

މިކަން ކުށްވެރިކޮށްފައި ވަނީ ފޮރިން މިނިސްޓްރީން މިއަދު ނެރުނު ބަޔާނެއްގަ އެވެ.

ޣައްޒާގައި ހުރި ދާރުލް އަރުޤަމް ސްކޫލަށް އިޒްރޭލުގެ ބާރުތަކުން ދިން ބޮމުގެ ހަމަލާގައި އަންހެނުންނާއި ކުޑަކުދިން ހިމެނޭހެން އެތައް އާންމުންނެ މަރުވެ، އަދި އެތައް ބަޔަކު ޒަޚަމްވި އެވެ.

މީގެ އިތުރުން ރަފާހުގެ މޫރާގު ސަރަޙައްދުގައި ހުރި ސައޫދީ ސަގާފީ އަދި ތަރިކައިގެ މަރުކަޒުން ހިންގަމުންދިޔަ ސިއްހީ ގުދަނަށް އިޒްރޭލުން ދިން ވައިގެ ހަމަލާ ވެސް ސަރުކާރުން ވަނީ ކުށްވެރިކޮށްފަ އެވެ. މި ހަމަލާގައި ޣައްޒާގައި ޒަޚަމްވެފައިވާ މީހުންނަށް އެހީވުމަށްޓަކައި ބޭނުންކުރަން ގެންގުޅުނު މުހިންމު ސިއްޙީ ތަކެތި ހަލާކުކޮށްލާފައިވެ އެވެ. މިއީ ބައިނަލްއަގުވާމީ ގާނޫނާއި ބައިނަލްއަގުވާމީ އިންސާނީ ގާނޫނާއި ހިލާފު އަމަލުތަކެއް ކަމަށް ސަރުކާރުން ނެރުނު ބަޔާނުގައި ބުނެފައިވެ އެވެ.

ދިވެހިރާއްޖެއިން ފަލަސްޠީނުގެ ރައްޔިތުންނަށް ކުރާ ތާޢީދު ތަކުރާރުކޮށް، މި މައްސަލައަށް ދެމެހެއްޓެނިވި އަދި އަދުލުވެރި ހައްލެއް ހޯދޭނީ 1967 ވަނަ އަހަރުގެ ކުރިން ކަނޑައެޅިފައި އޮތް އިންތަކުގެ މައްޗަށް ބިނާކޮށް، އިރުމަތީ ގުދުސްއަކީ ފަލަސްތީނުގެ ވެރިކަންކުރާ ރަށްކަމުގައި ކަނޑައަޅައި، ފަލަސްތީނުގެ މިނިވަން ދައުލަތެއް ގާއިމުކުރެވިގެން ކަމަށް ރާއްޖެއިން ދެކޭކަމަށް ވެސް ބަޔާނުގައި ވެ އެވެ.