މަޖިލީހަށް ހުށަހަޅާފައިވާ މީޑިއާ ކޮމިޝަންގެ ބިލް ފަރުމާކޮށްފައި ވަނީ އެ ކޮމިޝަނަށް ސިޔާސީ ނުފޫޒު ފޯރުވޭގޮތަށް ކަމަށް މޯލްޑިވްސް މީޑިއާ ކައުންސިލުން ބުނެފި އެވެ.

މީޑިއާ ކޮމިޝަންގެ ބިލް ދިރާސާ ކުރާ މަޖިލީހުގެ މިނިވަން މުއައްސަސާތަކުގެ ކޮމިޓީގައި ވާހަކަދައްކަވަމުން މީޑިއާ ކައުންސިލްގެ މެންބަރު ފާތިމަތު ނަހުދާ ފާއިޒް ވިދާޅުވީ އެ ބިލްގައިވާގޮތުން މީޑިއާތަކުން އިންތިހާބު ކުރާ މެންބަރުން ވަކިކުރުމުގެ ބާރު ރައްޔިތުންގެ މަޖިލީހަށް ލިބިގެންވާ ކަމަށެވެ. އެހެންކަމުން އެއީ އެ ކޮމިޝަނަށް ސިޔާސީ ނުފޫޒު ފޯރުވަން ހުޅުވާލާފައިވާ ދޮރެއް ކަމަށް ނަހުދާ ވިދާޅުވި އެވެ.

މީޑިއާ ކައުންސިލްގެ ރައީސް ހުސެއިން ސަގީފް ވިދާޅުވީ އެ ބިލު ޑްރާފްޓު ކޮށްފައި ވަނީ އެ ކައުންސިލްގެ އިތުރުން ނޫސްވެެރިންނާ ވެސް އެއްވެސް މަޝްވަރާއެއް ކުރުމެއް ނެތި ކަމަށެވެ. އަދި އެއީ އެއްވެސް ދިރާސާއެއް ކުރުމަށްފަހު ހުށަހަޅާފައިވާ ބިލެއް ނޫން ކަމަށް ވެސް ސަގީފް ވިދާޅުވި އެވެ.

"އަޅުގަނޑުމެންނާ މޯލްޑިވްސް ބްރޯޑްކާސްޓިން ކޮމިޝަން އެއްކޮށްލާ ވާހަކަ މި ދައްކަނީ، ދައްކާއިރު އަޅުގަނޑުމެންގެ މަސްލަހަތު ވެސް މިހާރު ގާނޫނީ ގޮތުން ޒިންމާ އުފުލަމުންދާ ފަރާތް ކަމަށްވާއިރު، އަޅުގަނޑުމެންގެ ހުރި ގޮންޖެހުންތަކާއި އަޅުގަނޑުމެންގެ ހުރި ކަންބޮޑުވުންތައް، އަޅުގަނޑުމެންގެ އިދާރާ މިހާރު ހިނގަމުންދާ ގޮތް ޑްރާފްޓެއް އެކުލެވިގެން ދާއިރުގައި އެއީ ގަބޫލު ކުރެވޭ ކަމެއް، އަޅުގަނޑުމެންގެ ހިޔާލާއި މަޝްވަރާ އެކަށީގެންވާ ގޮތަށް ހޯދަންޖެހޭނެ ކަމަށް، ދިރާސާ ކުރަންޖެހޭނެ ކަމަށް،" ސަގީފް ވިދާޅުވި އެވެ.

އެ ބިލް ފަރުމާކޮށްފައި ވަނީ ވެސް ގާނޫނުއަސާސީން ކަށަވަރުކޮށްދީފައިވާ ނޫސްވެރިކަމުގެ މިނިވަންކަން ހަނިވާގޮތަށް ކަމަށް ވެސް އޭނާ ވިދާޅުވި އެވެ.

ބައިނަލްއަގުވާމީ އެކި ޖަމިއްޔާތައް ހިމެނޭހެން އެކި ފަރާތްތަކުން އެ ބިލް އަނބުރާ ގެންދިޔުމަށް ގޮވާލަމުން ދަނިކޮށް ބަންޑާރަ ނައިބު އަހްމަދު އުޝާމް ވަނީ އެ ބިލްގެ ދިފާއުގައި ވާހަކަދައްކަވާފަ އެވެ.