މިސްރުގެ ސުއޭޒު ކެނެލްގައި ތާށިވި އާގުބޯޓު އެ ގައުމުގައި ހިފަހައްޓައިފި އެވެ.

ޕެނަމާ ގައި ރަޖިސްޓްރީކޮށްގެން ދުއްވާ 1،300 ފޫޓު ދިގު މިނުގެ "އެވާ ގިވެން" ނަމަކަށް ކިޔާ މި އާގުބޯޓު މިސްރުގައި ހިފަހައްޓާފައިވަނީ ކެނެލްގައި ބޯޓު ތާށިވުމުގެ ސަބަބުން ލިބުނު ގެއްލުމުގެ ބަދަލު ދައްކަންދެން ކަމަށް މިސްރުގެ ކަމާބެހޭ އިދާރާ ތަކުން ބުނެ އެވެ.

އެގޮތުން ކޯޓު އަމުރެއްގެ ދަށުން ބޯޓު ފުރުން ހުއްޓުވާފައިވާއިރު، ލިބުނު ގެއްލުމުގެ ގޮތުގައި 916 މިލިއަން އެމެރިކާ ޑޮލަރު ހޯދަން ސުއޭޒް ކެނަލް ހިންގާ ސުއޭޒު ކެނަލް އޮތޯރިޓީން ވަނީ އެދިފަ އެވެ.

އޭގެ ތެރޭގައި ބޯޓު ފުން ކުރުމަށް ހޭދަވި ޚަރަދާއި ސުއޭޒު ކެނަލް އޮތޯރިޓީއަށް ލިބުނު ނޭދެވޭ ސަމާލުކަމުގެ ބަދަލު ހިމެނޭ ކަމަށް ބޯޓުގެ އިންޝުއަރެންސް ކުންފުނިން ބުނެފައިވެ އެވެ.

މާޗް މަހުގެ 23 ވަނަ ދުވަހު ކެނެލްއަށް ހުރަސްވި ބޯޓު ފުންކުރެވުނީ އޭގެ ހަތް ދުވަސް ފަހުން ބައިނަލްއަގުވާމީ އެހީތެރިކަމާ އެކު އެވެ. އެކަމުގެ ސަބަބުން އުތުރާއި ދެކުނު ގުޅުވައިދޭ މައި މަގު ބަންދުވެ، ގިނަ ބޯޓުތަކެއް ވަނީ ކެނަލްގެ ދެފަރާތުގައި ގިނަ ދުވަސް ވަންދެން ތާށިވެފަ އެވެ.

ބޯޓުގެ އިންޝުއަރެންސް ކުންފުނިން ބުނީ ބޯޓު ހިފަހައްޓާފައި އޮތް އޮތުމާމެދު ހިތާމަ ކުރާ ކަމަށާއި ލިބުނު ގެއްލުމަށް އެކަށީގެންވާ ބަދަލެއް ހުށައަޅާފައި ވާނެ ކަމަށެވެ.