މިދިޔަ ކައުންސިލް އިންތިހާބުގައި މާލެ ސިޓީގެ ނަތީޖާ ގަބޫލުނުކޮށް ކޯޓަށް ދިއުމަށް އެޖެންޑާކޮށް، އެމްޑީޕީގެ ގައުމީ ހިންގާ ކޮމެޓީގެ ބައްދަލުވުމެއް މިރޭ ބާއްވަން ނިންމައިފި އެވެ.

އެމްޑީޕީން މިއަދު ބުނީ މިރޭ 9:30 ގައި އެޕާޓީގެ ގައުމީ ހިންގާ ކޮމެޓީގެ ބައްދަލުވުމެއް އޮނާނެ ކަމަށާއި މި ބައްދަލުވުން ކުރިއަށް ގެންދިއުމަށް ހަމަޖެހިފައިވަނީ ބިލަބޮން ހައި އިންޓަނޭޝަނަލްގައި ކަމަށެވެ.

މި ބައްދަލުވުމުގެ ދެ ކަމެއް ވަނީ އެޖެންޑާ ކުރެވިފަ އެވެ. އެއީ އެމްޑީޕީގެ ދާއިރާތަކުގެ އިންތިހާބުގެ ކެނޑިޑޭޓުންގެ ޝަރުތު ކަނޑައެޅުމުގެ އިތުރުން ނިމުނު ލޯކަލް ކައުންސިލް އިންތިހާބުގެ މައްސަލާގައި ކޯޓަށް ދިއުމާއި މެދު ގޮތެއް ނިންމުމެވެ.

އެމްޑީޕީން ކޯޓަށް ހުށަހެޅުމަށް ނިންމާފައިވަނީ އިލެކްޝަންސް ކޮމިޝަނަށް ޝަކުވާގެ ގޮތުގައި ހުށަހެޅި މާލޭގެ ހަ ދާއިރާގެ ވޯޓު ފޮށީގެ މައްސަލަ އެވެ. އެއީ މެދު ހެންވޭރު ދާއިރާ, ހެންވޭރު ދެކުނު ދާއިރާ، ހެންވޭރު ހުޅަނގު ދާއިރާ، މައްޗަންގޯޅި އުތުރު ދާއިރާގެ އިތުރުން މާފަންނު އުތުރު ދާއިރާ، މާފަންނު ހުޅަނގު ދާއިރާ އެވެ.

އެމްޑީޕީގެ ގައުމީ މަޖިލީހުގެ ދާއިރާތަކުގެ އިންތިޚާބުގައި ވާދަކުރަން ނިންމާފައިވާކަން އެ ޕާޓީގެ މެމްބަރުން ދަނީ ހާމަ ކުރަމުންދާއިރު އެއިންތިހާބު ބޭއްވުމަށް ނިންމާފައިވަނީ މެއި 29 ދުވަހު އެވެ. އެމްޑީޕީން ދަނީ ދާއިރާތަކުގެ އިންތިޚާބަށް ވާންޖެހޭ ތައްޔާރީތައް ވަމުންނެވެ.