ޗައިނާގެ ނިއުކުލިއާ ޕްރާގްރާމާއި ގުޅޭ ސިއްރު މައުލޫމާތު އެމެރިކާއަށް ފޯރުކޮށްދޭކަމުގެ ތުހުމަތު އެ ގައުމުގެ އަސްކަރިއްޔާގެ އިސް އޮފިޝަލަކަށް ކޮށްފި އެވެ.

ޖެނެރަލް ޒަން ޔޫސިއާ 75، އަށް ކުރެވޭ ތުހުމަތުތަކާއި ގުޅިގެން މިހާރު ކުރަމުންދާ ތަހުގީގުގައި އޭނާ އޮފިޝަލުންނަށް ރިސްވަތު ބެހިކަމާއި، ނުހައްގު ޕްރޮމޯޝަން ދީފައިވާ ކަމަށްވެސް ވަނީ ބުނެފަ އެވެ.

ވޯލް ސްޓްރީޓް ޖޯނަލްއިން ރިޕޯޓުކޮށްފައިވާ ގޮތުން ޖެނެރަލް ޒަން ވަނީ ޗައިނާގެ ނިއުކްލިއާ ޕްރޮގްރާމާއި ގުޅޭ ސިއްރު ޓެކްނިކަލް މައުލޫމާތު އެމެރިކާއަށް ދީފައިވުމުގެ އިތުރުން އޭނާގެ މަގާމުގެ ނުފޫޒު ބޭނުންކޮށްގެން ސިޔާސީ މަންފާ ނެގުމަށް މަސައްކަތް ކޮށްފައިވާ ކަމަށެވެ.

މި މަހުގެ 24 ވަނަ ދުވަހު ޗައިނާގެ ޑިފެންސް މިނިސްޓްރީއިން ވަނީ ޖެނެރަލް ޒަންގެ މައްސަލަތަކެއް ބަލަމުން އަންނަކަން ހާމަކޮށްފަ އެވެ.

ޗައިނާގެ ރައީސް ޝީ ޖިންޕިންގެ އަރިސް ބޭފުޅެއްގެ ގޮތުގައި ފާހަގަކުރެވޭ ޖެނެރަލް ޒަން، އަސްކަރިއްޔާގެ އޮފިސަރުންނަށް އުސޫލާއި ހިލާފުން ޕްރޮމޯޝަން ދިނުމުގައި ގިނަ އަދަދެއްގެ ފައިސާ ނަގާފައިވާ ކަމަށްވެސް ތަހުގީގާއި ގުޅޭ ރިޕޯޓުތައް ބުނެ އެވެ.

ރައީސް ޝީގެ ލީޑަޝިޕްގެ ދަށުން ހިންގާ ސީޕީސީން ވަނީ 2023 ވަނަ އަހަރުން ފެށިގެން ޑިފެންސް ދާއިރާގެ އެކި އިސް މަސްއޫލިވެރިން ކޮރަޕްޝަންގެ ތުހުމަތުގައި މަގާމުން ދުރުކޮށްފަ އެވެ. އޭގެފަހުން ޑިފެންސް ދާއިރާގައި ކޮރަޕްޝަން ނައްތާލުމަށް ކުރާ މަސައްކަތްތައް އިތުރަށް ވަރުގަދަކޮށްފައިވާ ކަމަށް އެ ގައުމުން ބުނެފައިވެ އެވެ.