އިޒްރޭލާއި އެމެރިކާ ގުޅިގެން އީރާނަށް ދިން ވަރުގަދަ ހަމަލާތަކުގައި އެގައުމުގެ އެންމެ މަތީ ވެރިޔާ އާޔަތުﷲ އަލީ ޚާމަނާއީ އަވަހާރަކޮށްލުމާ ގުޅިގެން، އީރާނުގެ އާ ލީޑަޝިޕާ ވާހަކަދެއްކުމަށް އެއްބަސްވެވަޑައިގެންފައިވާ ކަމަށް ރައީސް ޓްރަމްޕް އާދިއްތަ ދުވަހު ވިދާޅުވެއްޖެ އެވެ.

"ދަ އެޓްލާންޓިކް" ނޫހުގެ މައިކަލް ޝެރާއަށް އާދިއްތަ ދުވަހުގެ ހެނދުނު ދެއްވި އިންޓަވިއުއެއްގައި ޓްރަމްޕް ވިދާޅުވީ، އީރާނުން މަޝްވަރާކުރަން ބޭނުންވާ ކަމަށާއި، އެކަމަށް އެމަނިކުފާނު އާނބަސް ވިދާޅުވެފައިވާ ކަމަށެވެ. ނަމަވެސް އެ މަޝްވަރާތައް ބާއްވާނެ ވަގުތެއް ހާމަކުރައްވާފައެއް ނުވެއެވެ. ޓްރަމްޕް އިތުރަށް ވިދާޅުވީ، އީރާނުން މި ނިންމުން މާ ކުރިން ނިންމަންޖެހޭ ކަމަށާއި، ފަސޭހައިން ކުރެވެން އޮތް ކަންކަމުގައި އެގައުމުން މާ ބޮޑަށް ލަސްކޮށްފައިވާ ކަމަށެވެ.

ޚާމަނާއީ އަވަހާރަވުމާ ގުޅިގެން، އީރާނުގެ ވަގުތީ ލީޑަޝިޕްގައި ހިމެނިވަޑައިގަންނަވާ ބޭފުޅުންނަކީ ރައީސް މަސްއޫދު ޕެޒެޝްކިއާން އާއި، ގާޑިއަން ކައުންސިލްގެ މެންބަރު އާޔަތުﷲ އަލީރިޒާ އަރާފީގެ އިތުރުން އީރާނުގެ ޖުޑީޝަރީގެ އިސްވެރިޔާ ޣުލާމް ހުސައިން މުހްސިނީ އެޖެއީ ކަމަށް އެގައުމުން ވަނީ އިއުލާނުކޮށްފަ އެވެ.

އެމެރިކާ އާއި އިޒްރޭލުން ގުޅިގެން ހޮނިހިރު ދުވަހު އީރާނަށް ދޭން ފެށި ހަމަލާތަކުގައި މިހާތަނަށް މަދުވެގެން 200 މީހުން މަރުވެފައިވާ ކަމަށް އީރާނުގެ ރެޑް ކްރެސެންޓުން ބުނެއެވެ.

މި ހަމަލާތަކުގައި ޚާމަނާއީގެ އިތުރުން އީރާނުގެ ގައުމީ ދިފާއީ މަޖިލީހުގެ ވެރިޔާ އަލީ ޝަމްޚާނީ އާއި، އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) ގެ އިސްވެރިޔާ މުހައްމަދު ޕާކްޕޫރު ފަދަ މުހިންމު އިސްވެރިންތަކެއް ވެސް ވަނީ އަވަހާރަވެފަ އެވެ.

މިކަމާ ގުޅޭގޮތުން ވާހަކަދައްކަވަމުން ޓްރަމްޕް ވިދާޅުވީ، ކުރިން މުއާމަލާތްކުރި ގިނަ ބަޔަކު މިހާރު ދުނިޔޭގައި ނެތް ކަމަށާއި، މިއީ އީރާނަށް ލިބުނު ވަރަށް ބޮޑު ނިކަމެތިކަމެއް ކަމަށެވެ. އަދި އީރާނުން މާ ބޮޑަށް "ބޮޑާވެގަނެގެން" ތިބުމުގެ ބަދަލުގައި، މާ ކުރިން އެއްބަސްވުމަކަށް އާދެވުނީސް ކަމަށް ވެސް ޓްރަމްޕް ވިދާޅުވި އެވެ.

އީރާނުގެ އިންތިގާލީ މަރުހަލާގައި ޕެޒެޝްކިއަން، އަރަފީ އަދި އެޖެއީ ތެހެރާންގެ ވެރިކަން ބަލަހައްޓަވަމުން ގެންދެވި ނަމަވެސް، އެ ގައުމުގެ ގާނޫނު އަސާސީ ބުނާގޮތުން 88 މެންބަރުންގެ މައްޗަށް އެކުލެވިގެންވާ "އެސެމްބްލީ އޮފް އެކްސްޕާޓްސް" އިން ވީ އެންމެ އަވަހަކަށް އައު ރޫހާނީ ލީޑަރަކު އިންތިޚާބު ކުރަންޖެހެ އެވެ.

ހޮނިހިރު ދުވަހު ދިން މި ހަމަލާއަކީ، އީރާނުގެ ނިއުކްލިއާ މަޝްރޫއާ ގުޅިގެން އެމެރިކާއާއި އީރާނާ ދެމެދު އުފެދިފައިވާ ހޫނު ނުތަނަވަސްކަން އިތުރަށް ގޯސްވެ، މަސްރަހު އިންތިހާއަށް ގޯސްވެގެންދިޔަ ކަމެކެވެ. މި ހަފުތާ ބަންދުގައި ހިންގި އަސްކަރީ ހަރަކާތުގެ ކުރިން، ތެހެރާނާއެކު ކުރިއަށްދާ މަޝްވަރާތައް ލަސްވުމުގެ ސަބަބުން ރައީސް ޓްރަމްޕް ވަނީ ހިތްހަމަނުޖެހުން ފާޅުކުރައްވާފަ އެވެ.

ވޭތުވެދިޔަ ހަފުތާތަކުގައި ޓްރަމްޕްގެ ސަރުކާރުން ވަނީ އެ ސަރަހައްދުގައި އެމެރިކާގެ އަސްކަރީ ބާރުތައް ވަރަށް ބޮޑަށް ވަރުގަދަކޮށްފަ އެވެ. އެމެރިކާގެ ސެންޓްރަލް ކޮމާންޑުން މައުލޫމާތު ދޭ ގޮތުގައި، ހޮނިހިރު ދުވަހުގެ އަސްކަރީ އޮޕަރޭޝަނުގައި އެމެރިކާ ސިފައިންގެ ތިން މީހަކު ވަނީ މަރުވެފަ އެވެ.