މާލޭގައި ހަނި ގޯޅިތަކުގައި ކުދިކޮދި ތަންކޮޅުތަކުގައި ދިރިއުޅެން ޖެހިފައިވާ މީހުން ހާލަތު ރަނގަޅު ތަނަކަށް ދިރިއުޅުން ބަދަލުކުރަން ސަރުކާރުން މަސައްކަތް ކުރާނެ ކަމަށް ހައުސިން މިނިސްޓަރު އަބްދުﷲ މުއްތަލިބު މިއަދު ވިދާޅުވެއްޖެ އެވެ.

މިއަދު ރައީސް އޮފީހުުގައި ބޭއްވި ނޫސްވެރިންގެ ބައްދަލުވުމެއްގައި ހައުސިން މިނިސްޓަރު މުއްތަލިބު ވިދާޅުވީ މާލޭގެ ގެތަކަށް ރައީސް މުހައްމަދު މުއިއްޒު ކުރައްވާ ޒިޔާރަތްތަކުގައި އެންމެ ބޮޑަށް ފާހަގަވާ އެއް ކަމަކީ މާލެއަށް ނިސްބަތްވާ އާއިލާތަކުގެ ތެރެއިން އެކި ސަބަބުތަކާހުރެ ގޯތި ނުހެދި، އެ ގޯތި ބައިބައިކޮށް ކުދި ތަންކޮޅުތަކުގައި ދިރިއުޅޭ ދަތި ހާލު ކަމަށެވެ.

އެފަދަ މީހުންނަށް އޮތް ހައްލަކީ ހާލަތު އެހެން ރަނގަޅު ތަނަކަށް ބަދަލުވުން ކަމަށާއި އެކަން ސަރުކާރުން ކުރާނެ ކަމަށް މިނިސްޓަރު ވިދާޅުވި އެވެ.

"އަދި މިހާރު ސަރުކާރުން އުސޫލުތައް ކަނޑައަޅައިގެން ހިންގާ ޕްރޮގްރާމުތަކުގެ ތެރެއިން ބޯހިޔާވަހިކަމުގެ ފުރުސަތު ނުލިބި ހުރި އާއިލާތަކެއް. އެކަކަށް ވަދެވޭ ވަރުގެ ކުދި ހަނި ގޯޅިތައް ވެސް އެބަހުރި. އެކަމަށް އަރިއަކަށް ހުރެގެން ވަންނަން ޖެހޭ ހަނި ގޯޅިތައް ވެސް އަޅުގަނޑުމެންނަށް ފެނިފައި އެބަހުރި. އެއްވެސް ކަހަލަ ވެންޓިލޭޝަނެއް ނެތް، އިންސާނުންނަށް އެކަށީގެންވާ ގޮތަށް ދިރިނޫޅެވޭނެ ތަންތަން ވެސް އެބަހުރި،" މިނިސްޓަރު ވިދާޅުވި އެވެ.

މިނިސްޓަރު ވިދާޅުވީ ސަރުކާރުން ނިންމާފައި ވަނީ އެފަދަ ފަރާތްތަކުން ފޯމު ހުށަހެޅުމުގެ ބަދަލުގައި މިނިސްޓްރީ ގެތަކަށް ޒިޔާރަތްކޮށް ހާލަތު ދެނެގަނެ އެފަދަ މީހުންގެ ލިސްޓެއް އެކުލަވާލުން ކަމަށެވެ. އަދި އެކަމަށްޓަކައި ހަދަންޖެހޭ އުސޫލުތައް ހެދުމުގެ މަސައްކަތް ކުރަމުން އަންނަ ކަމަށް ވެސް ވިދާޅުވި އެވެ.

"އެއީ ސަރުކާރުން މިހާތަނަށް އެތައް ޕްރޮގްރާމެއް ހިންގާފައި ހުރި އިރު އެ އާއިލާތަކަށް ނެތް ހަގީގަތުގައި އެ ހުރި ދަތިކަމުގެ، ނިކަމެތިކަމުގެ ތެރެއިން ނިކުމެވޭނެ އެއްވެސް މަގެއް ފަހިކުރެވިފައި. އެހެންވީމާ ސަރުކާރުން ސެލެކްޓިވްކޮށް، އެ މީހުންނަށް އިންޓަވެންޝަންތަކެއް ހަދައިގެން ނޫނިއްޔާ ހައްލު ނުކުރެވޭނެ ފަދަ މައްސަލަތަކެއް ކަމަށް ފާހަގަ ކުރެވެނީ،" އޭނާ ވިދާޅުވި އެވެ.