ޖެފްރީ އެޕްސްޓީންގެ މައްސަލައާ ގުޅިގެން ކުރިން އާންމުކުރި ލިޔެކިޔުންތަކުގެ ތެރޭގައި ހިމެނިފައި ނުވާ، ޑޮނަލްޑް ޓްރަމްޕާ ދެކޮޅަށް ކުރެވޭ ޖިންސީ ގޯނާގެ ތުހުމަތުތަކާ ގުޅޭ އެފްބީއައިގެ ލިޔުންތަކެއް އެމެރިކާގެ ޖަސްޓިސް ޑިޕާޓްމަންޓުން އޮންލައިންކޮށް އާންމުކޮށްފި އެވެ.

މި ލިޔުންތައް އާންމުކޮށްފައިވަނީ، ސްކައި ނިއުސްގެ ބައިވެރިއެއް ކަމަށްވާ އެން.ބީ.ސީ ނިއުސް ހިމެނޭހެން އެމެރިކާގެ ބައެއް މީޑިއާތަކުން އެ ލިޔުންތައް މަދުވާކަމަށް ރިޕޯޓްކުރުމާ ގުޅިގެންނެވެ.

ޖަސްޓިސް ޑިޕާޓްމަންޓުން ހާމަކުރި ގޮތުގައި، އެ އިދާރާގެ ސަމާލުކަމަށް އައި މަދުވި ބައެއް ފައިލްތަކަކީ ޑްޕްލިކޭޓް ލިޔުން ގޮތުގައި އޮޅުމަކުން ފާހަގަކުރެވިފައިވާ ލިޔުންތަކެކެވެ. އެހެންކަމުން އެ ލިޔުންތައް އާންމުންނަށް ނުފެންނަ ގޮތަށް ހުރި ނަމަވެސް، މިހާރު އެ ކުށް އިސްލާހުކޮށްފައިވާ ކަމަށް އެ އިދާރާއިން ބުނެފައި ވެއެވެ.

ހާމަކުރި މި ލިޔުންތަކުގެ ތެރޭގައި، ޖެފްރީ އެޕްސްޓީންގެ ފަރާތުން ޖިންސީ އަނިޔާ ލިބުނު ކަމަށާއި، މިހާރުގެ ރައީސް (ޓްރަމްޕް) ގެ ފަރާތުން ގޯނާ ލިބުނު ކަމަށް ތުހުމަތުކުރާ އަންހެނަކާއެކު އެފްބީއައި އިން ކުރިއަށް ގެންދިޔަ ވަކިވަކި ތިން އިންޓަވިއުއެއްގެ ހުލާސާއާއި ނޯޓްތައް ހިމެނެ އެވެ.

ނަމަވެސް، މި ތުހުމަތުތަކަށް ރައީސް ޓްރަމްޕް އަބަދުވެސް އިންކާރު ކުރައްވަ އެވެ. ޓްރަމްޕާއި ވައިޓް ހައުސްއިން ބުނަމުންދަނީ އެޕްސްޓީންގެ ފައިލްތަކުން ޓްރަމްޕްގެ މައުސޫމްކަން ސާބިތުވާ ކަމަށެވެ.

މިދިޔަ ބުރާސްފަތި ދުވަހު ނެރުނު ބަޔާނެއްގައި، ރައީސް ޓްރަމްޕްގެ ޕްރެސް ސެކްރެޓަރީ ކެރޮލީން ލީވިޓް ވިދާޅުވީ، އެ ތުހުމަތުތަކަކީ އަސާސެއް ނެތް އަދި އެއްވެސް މިންވަރެއްގެ އިތުބާރު ހުރި ހެއްކެއް ނެތް ވާހަކަތަކެއް ކަމަށެވެ. ޖަސްޓިސް ޑިޕާޓްމަންޓުންވެސް މީގެ ކުރިން އިންޒާރު ދީފައިވަނީ، އެ ފައިލްތަކުގެ ތެރޭގައި ރައީސްއާ ގުޅޭގޮތުން ސާބިތު ނުހިފޭ ތުހުމަތުތަކެއް ހިމެނޭ ކަމަށެވެ.

ކުރެވޭ ތުހުމަތުތަކަކީ ކޮބައިތަ؟

ސައުތު ކެރޮލީނާއަށް ނިސްބަތްވާ މި އަންހެން މީހާ، ތަހުގީގީ އިދާރާތަކަށް މި މައުލޫމާތު ދިނީ 2019 ވަނަ އަހަރު އެޕްސްޓީން ހައްޔަރުކުރުމާ ގުޅިގެންނެވެ. އޭނާ ތުހުމަތުކުރާ ގޮތުގައި، އުމުރުން އެންމެ 13 އަހަރުގައި، އެޕްސްޓީން ވަނީ އޭނާ ދިރިއުޅޭ ސްޓޭޓްގެ ހިލްޓަން ހެޑް އައިލެންޑްގައި އޭނާއަށް ޖިންސީ ގޯނާކޮށްފަ އެވެ.

އެފްބީއައިގެ އިންޓަވިއުއެއްގެ ހުލާސާއިން އެނގޭ ގޮތުގައި، މި ހާދިސާ ހިނގާފައިވަނީ 1984 ވަނަ އަހަރު އެވެ.

އެފްބީއައި އިން ވަނީ 2019 ވަނަ އަހަރުގެ ތެރޭގައި ހަތަރު ފަހަރެއްގެ މަތިން އޭނާގެ އިންޓަވިއުތައް ނަގާފަ އެވެ. އެއީ ޖުލައި 24، އޮގަސްޓް 7، އޮގަސްޓް 20 އަދި އޮކްޓޫބަރު 16 ގައެވެ.

މި ތާރީހުތައް ހާމަވެފައިވަނީ، އެޕްސްޓީންގެ ކުރީގެ ލޯބިވެރިޔާ އަދި މި މައްސަލައިގައި ކުށް ސާބިތުވެފައިވާ ގިސްލައިން މެކްސްވެލްއާ ދެކޮޅަށް ހުށަހެޅި ހެކިތަކުގެ ތެރެއިންނެވެ. ނަމަވެސް، އެޕްސްޓީންގެ ފައިލްތަކުގެ ތެރެއިން އެންމެ ފުރަތަމަ އާންމުކުރެވުނީ ހަމައެކަނި ޖުލައި 24 ގެ އިންޓަވިއުގެ ހުލާސާ އެވެ. އޭގައި ޓްރަމްޕާ ދެކޮޅަށް އެއްވެސް ތުހުމަތެއް ކޮށްފައެއް ނުވެ އެވެ.

މިހާރު އަލަށް އާންމުކޮށްފައިވަނީ އަނެއް ތިން އިންޓަވިއުގެ ނޯޓްތަކެވެ. ނަން ސިއްރުކޮށްފައިވާ މި އަންހެން މީހާ ތުހުމަތުކުރާ ގޮތުގައި، އެޕްސްޓީންގެ އިތުރުން އޭނާގެ ގާތް ބައެއް މީހުންނާއި، ޓްރަމްޕްގެ ފަރާތުންވެސް އޭނާއަށް ގޯނާ ލިބިފައި ވެއެވެ.

'ތުހުމަތުތަކަކީ ދޮގު އަދި އަސާސެއް ނެތް ވާހަކަތަކެއް'

ޖަސްޓިސް ޑިޕާޓްމަންޓުން އަނެއްކާވެސް ބުނެފައިވަނީ، އެޕްސްޓީންގެ ފައިލްތަކުގައި ދޮގު އަދި ކަށަވަރު ނުކުރެވޭ ތުހުމަތުތަކެއް ހިމެނޭ ކަމަށެވެ. މި ފައިލްތައް އާންމުކުރުމަށް އަމުރުކުރީ 'އެޕްސްޓީން ފައިލްސް ޓްރާންސްޕޭރެންސީ އެކްޓް' ގެ ދަށުންނެވެ. މިއީ ކޮންގްރެސްގެ ރިޕަބްލިކަން މެންބަރުންގެ ބާރުއެޅުމާއެކު، މިދިޔަ އަހަރުގެ ފަހުކޮޅު ޓްރަމްޕް އަމިއްލަފުޅަށް ސޮއިކުރައްވައި ތަސްދީގުކުރެއްވި ގާނޫނެކެވެ.

ފައިލްތައް އާންމުކުރި ވަގުތު އެ އިދާރާއިން ބުނެފައިވަނީ، މީގެ ތެރޭގައި ސައްހަ ނޫން ފޮޓޯތަކާއި ވީޑިއޯތައްވެސް ހުރެދާނެ ކަމަށެވެ. ސަބަބަކީ އެ ގާނޫނުގެ ދަށުން، އާންމުންގެ ފަރާތުން އެފްބީއައި އަށް ލިބިފައިވާ ހުރިހާ މައުލޫމާތެއް އާންމުކުރަން ޖެހޭތީ އެވެ.

އަދި ބައެއް ލިޔުންތަކުގައި ރައީސް ޓްރަމްޕާ ދެކޮޅަށް ހަގީގަތާ ހިލާފު، ހަލަބޮލިކަން އުފެދޭ ފަދަ ވާހަކަތައް ހުރި ކަމަށާއި، އެއީ 2020 ވަނަ އަހަރުގެ އިންތިހާބުގެ ކުޑަދުވަސްކޮޅެއް ކުރިން އެފްބީއައި އަށް ހުށަހަޅާފައިވާ ކަންކަން ކަމަށްވެސް އެ އިދާރާއިން ބުންޏެވެ.

ޖަސްޓިސް ޑިޕާޓްމަންޓުން އިތުރަށް ބުނީ، މި ތުހުމަތުތަކަކީ އެއްވެސް އަސާސެއް ނެތް ދޮގު ވާހަކަތަކެއް ކަމަށާއި، އޭގައި ކުޑަވެސް ހަގީގަތެއް އޮތްނަމަ މީގެ މާ ކުރިންވެސް އެ ވާހަކަތައް ޓްރަމްޕާ ދެކޮޅަށް ބޭނުންކޮށްފައިވާނެ ކަމަށެވެ.

މި ފައިލްތައް އާންމުކުރުމަށް ލާޒިމްކުރާ ގާނޫނު ބުނާގޮތުން، އަނިޔާ ލިބުނު މީހުންގެ މައުލޫމާތާއި، ކުޑަކުދިންނަށް ޖިންސީ ގޯނާކުރާ މަންޒަރު ދައްކުވައިދޭ ތަކެއްޗާއި، ތަހުގީގަކަށް ހުރަސްއެޅިދާނެ ފަދަ މައުލޫމާތުތައް ހިފެހެއްޓުމުގެ އިހުތިޔާރު ޖަސްޓިސް ޑިޕާޓްމަންޓަށް އޮވެ އެވެ. ނަމަވެސް، ސަރުކާރުގެ އިސް ބޭފުޅަކަށް ނުވަތަ ސިޔާސީ މީހަކަށް ލަދުވެތިކަމެއް ކުރިމަތިވެދާނެތީ ނުވަތަ އަބުރަށް އުނިކަމެއް އަތުވެދާނެތީ އެއްވެސް މައުލޫމާތެއް ހިފެހެއްޓުމަކީ މަނާކަމެކެވެ.

އެޕްސްޓީންގެ ފައިލްތަކާ ގުޅިގެން މިވަގުތު އެމެރިކާގައި އެއްވެސް މީހެއްގެ މައްޗަށް ޖިނާއީ ތަހުގީގެއް ކުރިއަކަށް ނުދެ އެވެ.