މާލޭގެ އެންމެ ކާރޫބާރު ބޮޑު އެއް ސަރަހައްދުގައި ހުންނަ ބަންޑާރަ މިސްކިތް ނުވަތަ މަސްޖިދުއްސުލްތާން މުހައްމަދު ޝަމްސުއްދީން ހުރި ބިމުގައި ޒަމާނީ ބޮޑު މިސްކިތެއް އެޅުމަށް ނިންމާފައިވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ވިދާޅުވެއްޖެ އެވެ.

މިނިސްޓަރު ޝަހީމް ވިދާޅުވީ އެ ތަނުގައި އާ މިސްކިތެއް އެޅުމުގެ އަމަލީ މަސައްކަތް ފެށުމަށް ހަމަޖެހިފައި ވަނީ ކުރިއަށް އޮތް ރަމަޟާން މަހަށް ފަހު ކަމަށެވެ. އަދި މި މަޝްރޫއަށް ބޭނުންވާ އެހީތެރިކަން ދީލަތި ފަރާތަކުން މިހާރު ހަމަޖެހިފައިވާ ކަމަށް ވެސް މިނިސްޓަރު ފާހަގަކުރެއްވި އެވެ.

"މާލޭގެ މަޖީދީ މަގުގައި ގިނަ ދުވަސްތަކެއްވަންދެން ވަގުތީ މިސްކިތެއްގެ ގޮތުގައި ހުރި ޒިކުރާ މިސްކިތް ހުރި ތަނުގައި ޒަމާނީ ބޮޑު މިސްކިތެއް އެޅުމަށް ވަނީ ދީލަތި އެހީ ހަމަޖެހިފަ. މި މިސްކިތެއް އެޅުމަށްޓަކައި މި ރަމަޟާން މަހުގެ 27 ވިލޭރޭ ބިންގާ އަޅުމަށް އެހީދެއްވާ ފަރާތުންވަނީ އެދިވަޑައިގެންފަ. ރޯދަ މަސް ނިމުމުން ވަގުތީ މިސްކިތް ތަޅާލައި ޢަމަލީ މަސައްކަތް ފަށާނެ." މިނިސްޓަރ ޝަހީމް ވިދާޅުވި އެވެ.

އެސްޓީއޯ ސުޕަމާޓާ ޖެހިގެން ހުންނަ މި މިސްކިތަކީ ތާރީޚީ ގޮތުން ފާހަގަކޮށްލެވޭ ބިނާއެކެވެ. މާލޭގެ އުތުރު ފަރާތުގައި ހުންނަ މި މިސްކިތަކީ ކުރިން ރާއްޖޭގައި އުޅުނު ވޯރާ ވިޔަފާރިވެރިން ބިނާކުރި މިސްކިތެކެވެ. އެ ދުވަސްވަރު މި މިސްކިތަށް ކިޔައި އުޅުނީ "ބުމްބާ މިސްކިތް" އެވެ. ނަމަވެސް ފަހުން އެ މިސްކިތުގެ ނަން ވަނީ ބަންޑާރަ މިސްކިތަށް ބަދަލުކޮށްފަ އެވެ.

މި މިސްކިތުގެ ބިނާއަށް އެކި ދުވަސްވަރު ބޮޑެތި ބަދަލުތަކެއް ވަނީ ގެނެސްފަ އެވެ. އެގޮތުން ކުރީގެ ރައީސް އިބްރާހިމް ނާސިރާއި ރައީސް މައުމޫން އަބްދުލްގައްޔޫމްގެ ސަރުކާރުގައި މިސްކިތުގެ ޑިޒައިނަށް ބޮޑެތި ބަދަލުތަކެއް ގެނެސް، ވޯރާ ވިޔަފާރިވެރިންގެ އަސަރުތައް އެ ބިނާއިން ވަނީ ކަނޑުވާލައިފަ އެވެ.

މިހާރު ހުރި މިސްކިތުގެ ބަދަލުގައި ޒަމާނީ ފެންވަރުގެ ބޮޑު މިސްކިތެއް ބިނާކުރުމަކީ އެ ސަރަހައްދުގެ ކާރޫބާރު ބޮޑުކަމުން ނަމާދުކުރަން އަންނަ ފަރާތްތަކަށް ލިބޭނެ ބޮޑު ލުޔަކަށް ވެގެންދާނެ އެވެ.