އީރާނުގެ ކަނޑުގެ ސިފައިންގެ މަނަވަރެއް ކަމަށްވާ އައިއާރުއައިއެސް ޑީނާއަށް އެމެރިކާ ސިފައިން ދިން ހަމަލާގެ ބަދަލު ހިފާނެ ކަމަށް ބުނެ، އެމެރިކާގެ މަތިންދާބޯޓު އުފުލާ މަނަވަރު ޔޫއެސްއެސް އަބްރަހަމް ލިންކަންއާ ދިމާއަށް އައްސޭރިން ކަނޑަށް ފޮނުވާ ބާވަތުގެ މިސައިލެއް ފޮނުވައިފި އެވެ.

އީރާނުގެ މީޑިއާތަކުން ރިޕޯޓުކޮށްފައިވާ ގޮތުގައި، އެ ޤައުމުގެ އަސްކަރިއްޔާގެ ޕަބްލިކް ރިލޭޝަންސް އޮފީހާ ހަވާލާދީ ބުނެފައިވަނީ ކަނޑުގެ ސިފައިންގެ ބާރުގަދަ މިސައިލް ނިޒާމަކުން ޔޫއެސްއެސް އެބްރަހަމް ލިންކަންއާ ދިމާއަށް އައްސޭރިން ކަނޑަށް ފޮނުވާ މިސައިލެއް މީގެ ކުޑައިރުކޮޅެއް ކުރިން ފޮނުވާފައިވާ ކަމަށެވެ.

މި ހަމަލާ ދީފައިވަނީ އެމެރިކާ ސިފައިން އީރާނުގެ މަނަވަރު އައިއާރުއައިއެސް ޑީނާއަށް ހަމަލާ ދިނުމާ ގުޅިގެންނެވެ. އީރާނުގެ އަސްކަރިއްޔާއިން ނެރުނު ބަޔާނެއްގައި ބުނެފައިވަނީ އެ އުޅަނދަށް ހަމަލާ ދީފައިވަނީ ހަނގުރާމައިގެ މައިދާނާ ގާތްގަނޑަކަށް 2,000 މޭލު ދުރުގައި ތަމްރީނު މިޝަނެއްގައި ދަތުރުކުރަމުން ދަނިކޮށް ކަމަށެވެ. އެ ބަޔާނުގައި ބުނެފައިވާ ގޮތުން، އެ އުޅަނދުގައި ތިބި ކެޑޭޓުން ދިޔައީ އިންޑިއާގައި ބޭއްވި ބައިނަލްއަޤުވާމީ ކަނޑުގެ ތަމްރީނު "މިލާން 2026" ގައި ބައިވެރިވެފައި އެނބުރި ދަތުރުކުރަމުންނެވެ. އީރާނުގެ އަސްކަރިއްޔާއިން އެ ހަމަލާ ސިފަކޮށްފައިވަނީ "ފިނޑި" ހަމަލާއެއްގެ ގޮތުގަ އެވެ.

މީގެ ކުރިންވެސް އީރާނުން ވަނީ އެމެރިކާގެ ޔޫއެސްއެސް އަބްރަހަމް ލިންކަން އަށް އަމާޒުކޮށް ހަމަލާތަކެއް ދީފަ އެވެ. އީރާނުގެ އެންމެ މަތީ އޮޕަރޭޝަނަލް ކޮމާންޑް ޔުނިޓް، ޚާތަމުލް އަންބިޔާ ސެންޓްރަލް ހެޑްކުއާޓާޒްގެ ތަރުޖަމާނު ވިދާޅުވެފައިވާ ގޮތުގައި، އައިއާރުޖީސީގެ ކަނޑުގެ ސިފައިން ވަނީ އޮމާން ކަނޑުގައި އީރާނުގެ ކަނޑުގެ ސަރަހައްދާ 340 ކިލޯމީޓަރު ދުރުގައި އޮތް އެ އޮތް އެ މަނަވަރަށް އެ ޤައުމުގައި އުފެއްދި ޑްރޯންތައް ބޭނުންކޮށްގެން ހަމަލާ ދީފަ އެވެ.

ޔޫއެސްއެސް އަބްރަހަމް ލިންކަން އަކީ ޖެނުއަރީ މަހުގެ ފަހުކޮޅުން ފެށިގެން އަރަބި ކަނޑުގެ ސަރަހައްދުގައި ހަރަކާތްތެރިވަމުން އަންނަ މަނަވަރެކެވެ. މި މަނަވަރަކީ އެ ސަރަހައްދުގައި އެމެރިކާގެ އަސްކަރީ ބާރު ދެއްކުމަށް ބޭނުންކުރާ މުހިންމު ވަސީލަތެކެވެ.