އެމެރިކާއާއި އީރާނުގެ މަޝްވަރާ ޓީމުތައް މި ހަފުތާގައި ގަތަރުގެ ދޯހާއަށް ދިއުމަށް ހަމަޖެހިފައިވީ ނަމަވެސް، ދެ ފަރާތުގެ މެދުގައި ބައްދަލުވުމެއް ބޭއްވުމަށް އަދި ތާވަލުކުރެވިފައި ނުވާ ކަމަށް އީރާނުން ހޯމަ ދުވަހު ބުނެފި އެވެ. އީރާނުން މިހެން ބުނެފައި މިވަނީ ހަތަރު މަސްވީ ހަނގުރާމަ ހުއްޓާލުމަށް ވެފައިވާ ވަގުތީ އެއްބަސްވުމަށް ގޮންޖަހައި، މިދިޔަ ބަންދު ދުވަސްތަކުގައި ދެ ފަރާތުން މިސައިލް ހަމަލާތަކެއް ބަދަލުކޮށްފައިވާ ދަނޑިވަޅެއްގަ އެވެ.

އެމެރިކާގެ ރައީސް ޑޮނަލްޑް ޓްރަމްޕްގެ ޕްރެސް ސެކްރެޓަރީ ކެރޮލިން ލީވިޓް ވިދާޅުވި ގޮތުގައި، މަޝްވަރާ ޓީމުގެ އިސްވެރިންގެ ގޮތުގައި ޓްރަމްޕް ފޮނުއްވަނީ އޭނާގެ ދަނބިދަރިފުޅު ޖެރާޑް ކުޝްނަރާއި މަންދޫބު ސްޓީވް ވިޓްކޮފް އެވެ. އީރާނުގެ ފަންނީ ވަފުދެއް މި ހަފުތާގައި ގަތަރަށް ދިއުމަށް ހަމަޖެހިފައިވީ ނަމަވެސް، އީރާނުގެ ފޮރިން މިނިސްޓްރީގެ ތަރުޖަމާނު އިސްމާއީލް ބަގާއީ ވިދާޅުވީ އެ ދަތުރަކީ އެމެރިކާގެ ވަފުދުގެ ޒިޔާރަތާ އެއްވެސް ގުޅުމެއް އޮތް ކަމެއް ނޫން ކަމަށާއި، ދެ ފަރާތުގެ މެދުގައި އެއްވެސް މަޝްވަރާއެއް ބޭއްވުމަށް ހަމަޖެހިފައި ނުވާ ކަމަށެވެ.

"ކުރިއަށް އޮތް ދުވަސްތަކުގައި އެމެރިކާއާއެކު އެއްވެސް ފެންވަރެއްގެ މަޝްވަރާ ބައްދަލުވުމެއް ބޭއްވުމަށް ހަމަޖެހިފައެއް ނެތް،" ބަގާއީ ވިދާޅުވި އެވެ.

ބައްދަލުވުން ބާއްވާނެތޯ ނުވަތަ ނޫންތޯ އުފެދިފައިވާ މި ހިޔާލުތަފާތުވުންތަކުން ދޭހަވަނީ ޖޫން 17 ގައި ވެވުނު އެއްބަސްވުމުގެ ބަލިކަށިކަމެވެ. ހޮރްމުޒް ކަނޑުއޮޅި މެދުވެރިކޮށް ދުނިޔެއަށް ތެޔޮ ސަޕްލައިކުރުމަށް ބުރޫއަރާފައިވާ މި ހަނގުރާމައަކީ، ނޮވެމްބަރު މަހު އޮންނަ އެމެރިކާގެ ކޮންގްރެސް އިންތިހާބާ ކުރިމަތިލައްވާއިރު ޓްރަމްޕަށް ކުރިމަތިވެފައިވާ ބޮޑު ސިޔާސީ ގޮންޖެހުމެކެވެ.

އޭޕްރީލް މަހުގެ ހަނގުރާމަ ހުއްޓާލުމުގެ އެއްބަސްވުން ދެމެހެއްޓުމަށާއި، އީރާނުގެ ނިއުކްލިއާ ޕްރޮގްރާމާ ބެހޭގޮތުން މަޝްވަރާކޮށް، ދާއިމީ ސުލްހައަކަށް ދިއުމަށް އެކުލަވާލި 14 ނުކުތާގެ އެއްބަސްވުން ތަންފީޒުކުރުމަށް ދެ ގައުމަށް މަދުވެގެން 60 ދުވަހުގެ މުއްދަތެއް ދީފައިވެ އެވެ. ނަމަވެސް، އެއްބަސްވުމާ ހިލާފުވާ ކަމުގެ ތުހުމަތު އެއް ބަޔަކު އަނެއް ބަޔަކަށް ކުރަމުންދާތީ، މި މަސައްކަތަށް ވަނީ ހުރަސްތަކެއް ކުރިމަތިވެފަ އެވެ.

ފެބްރުއަރީ 28 ގައި އެމެރިކާއާއި އިޒްރޭލުން އީރާނަށް ދިން ހަމަލާތަކަށްފަހު، ދުނިޔޭގެ ތެލުގެ ވިޔަފާރީގެ ފަސްބައިކުޅަ އެއްބައި އުފުލާ ހޮރްމުޒް ކަނޑުއޮޅީގެ ދަތުރުފަތުރު ވަނީ މުޅިން ކަހަލަ ގޮތަކަށް ހުއްޓިފަ އެވެ.

އެމެރިކާއާއި އީރާނުގެ ސުލްހައިގެ ވާހަކަތަކުގައި އިޒްރޭލުން ބައިވެރިއެއް ނުވެ އެވެ. ވޮޝިންޓަނާއި ތެހެރާނާ ދެމެދު އޮތް ނުތަނަވަސްކަމުގެ ސަބަބުން، ލުބުނާނުގެ ހަނގުރާމަ ހުއްޓާލުމަށް ކުރާ މަސައްކަތްތަކަށް ވެސް ވަނީ ހުރަސް އެޅިފަ އެވެ. އީރާނުގެ ތާއީދު އޮންނަ ހިޒްބުاللهގެ ބައިވެރިއެއް ކަމަށްވާ ލުބުނާނުގެ މަޖިލީހުގެ ރައީސް ނަބީހް ބެއްރީ ވަނީ، އެމެރިކާ މެދުވެރިވެގެން އިޒްރޭލާއި ލުބުނާނާ ދެމެދު ވެފައިވާ ވަކި އެއްބަސްވުމަކާ މެދު ޝައްކު އުފައްދާފަ އެވެ.

ކަނޑުއޮޅި ބަންދުވުމާ ގުޅިގެން ތެޔޮ ފީފާއެއްގެ އަގު 100 ޑޮލަރަށްވުރެ މައްޗަށް އަރައި، ދުނިޔޭގެ އިންފްލޭޝަން މަތިވެފައިވާއިރު، މިއީ އިންތިހާބާ ކުރިމަތިލައްވާ ޓްރަމްޕަށް އޮތް ބޮޑު ފިއްތުމެކެވެ. ރިޕަބްލިކަން ޕާޓީގެ ބައެއް މެންބަރުން ވެސް ގެންދަވަނީ ގާނޫނު ހަދާ މަޖިލީހުގެ ހުއްދަނެތި ހަނގުރާމަ ކުރިއަށް ގެންދާތީ ޓްރަމްޕަށް ފާޑުވިދާޅުވަމުންނެވެ.

އީރާނުގެ އިސް އޮފިޝަލަކު ވިދާޅުވި ގޮތުގައި އަންގާރަ ދުވަހު ދޯހާގައި ބައްދަލުވުމެއް އޮންނާނެ އެވެ. ނަމަވެސް، ކުރިން ސްވިޒަލޭންޑުގައި ބޭއްވި ފަންނީ މަޝްވަރާތަކާ ހިލާފަށް، މިފަހަރުގެ ބައްދަލުވުމުގައި މައިގަނޑު ގޮތެއްގައި މަޝްވަރާ ކުރާނީ ހޮރްމުޒް ކަނޑުއޮޅި ބެލެހެއްޓުމާއި މަސްރަހު ފިނިކުރުމާ ގުޅޭގޮތުންނެވެ. އަދި ބުދަ ދުވަހު އެމެރިކާއާއި އީރާނުގެ ޓީމުތަކުން ގަތަރާއި ޕާކިސްތާނުގެ މެދުވެރިންނާ ވަކިވަކިން ބައްދަލުކުރާނެ ކަމަށް މައުލޫމާތު ލިބެ އެވެ.

ވޮޝިންޓަނުގެ ނުތަނަވަސްކަން

ޓްރަމްޕް ނޫސްވެރިންނަށް ވިދާޅުވީ ދޯހާ ބައްދަލުވުމަކީ މުހިންމު ބައްދަލުވުމަކަށް ވެދާނެ ކަމަށާއި، ނޫނީ އެއީ މާ މުހިންމު ނޫން ކަމަކަށް ވެސް ވެދާނެ ކަމަށެވެ. ހަމައެއާއެކު، އަސްކަރީ ގޮތުން ކުރި ހޯދަމުންދަނީ އެމެރިކާ ކަމަށާއި، އީރާނުން ނިއުކްލިއާ ހަތިޔާރު އުފެއްދުން ހުއްޓުވަން ޖެހޭނެ ކަމަށް އޭނާ ތަކުރާރުކުރެއްވި އެވެ.

އީރާނުން ދަނީ ހޮރްމުޒް ކަނޑުއޮޅީގެ ކޮންޓްރޯލް ބޭނުންކޮށްގެން ނުފޫޒު ފޯރުވަމުންނެވެ. އެގޮތުން ކަނޑުއޮޅިން ދަތުރުކުރާ އުޅަނދުތަކުން ފީ ނެގުމަށާއި، ކަނޑައެޅިފައިވާ މަގުން ނޫން ގޮތްގޮތަށް ދަތުރުކުރާ އުޅަނދުތަކަށް ހުރަސް އެޅުމަށް އީރާނުން ރާވަމުންދެ އެވެ. އެމެރިކާއިން ވަނީ ފާއިތުވި ދުވަސްތަކުގައި އީރާނުން ވިޔަފާރި އުޅަނދުތަކަށް މިސައިލާއި ޑްރޯން ހަމަލާ ދީފައިވާ ކަމަށް ތުހުމަތުކޮށް، އީރާނުގެ އަސްކަރީ މަރުކަޒުތަކަށް ބޮން އަޅާފަ އެވެ. މީގެ ރައްދުގައި އީރާނުން ވަނީ ކުވެއިތާއި ބަހްރޭންގައި ހުރި އެމެރިކާގެ މަރުކަޒުތަކަށް އާދީއްތަ ދުވަހު ހަމަލާ ދީފަ އެވެ.

ހިފަހައްޓާފައިވާ ފައިސާ ދޫކޮށްލުން

އީރާނުގެ ރައީސް މަސްއޫދު ޕެޒެޝްކިއާން ވިދާޅުވި ގޮތުގައި، ގަތަރުގައި ހިފަހައްޓާފައިވާ 12 ބިލިއަން ޑޮލަރުގެ ތެރެއިން 6 ބިލިއަން ޑޮލަރު ދޫކޮށްލުމަށް ވަނީ ހަމަޖެހިފަ އެވެ. އޭނާ ސިފަކުރެއްވި ގޮތުގައި މިއީ އީރާނުގެ ތެލާއި ޕެޓްރޯކެމިކަލް ދާއިރާއަށް އަޅާފައިވާ ދަތިކުރުމުގެ ފިޔަވަޅުތަކަށް އެމެރިކާއިން ލުއިދިނުމާއެކު ލިބުނު ބޮޑު ކާމިޔާބީއެއް ކަމަށެވެ.

ފްރާންސްގެ ރައީސް އެމަނުއަލް މެކްރޮން ވިދާޅުވީ އޮމާނާއެކު ގުޅިގެން މަސްރަހު ފިނިކުރުމަށާއި ހޮރްމުޒް ކަނޑުއޮޅީގައިވާ މައިންތައް ނައްތާލުމަށް މަސައްކަތް ކުރައްވާނެ ކަމަށެވެ. ނަމަވެސް އީރާނުގެ ޑެޕިއުޓީ ފޮރިން މިނިސްޓަރު ކާޒިމް ގަރީބާބާދީ ވިދާޅުވީ، މައިން ނައްތާލުމުގެ މަސައްކަތަކީ 14 ނުކުތާގެ އެއްބަސްވުމާ އެއްގޮތަށް ހަމައެކަނި އީރާނުން ކުރަންޖެހޭ ކަމެއް ކަމަށެވެ. އަދި މި މައްސަލައިގެ ތެރެއަށް ވަދެ މަސްރަހު އިތުރަށް ގޯސްނުކުރުމަށް އޭނާ ވަނީ ފްރާންސަށް އިންޒާރު ދެއްވާފަ އެވެ.