މެލޭޝިޔާގެ ކުރީގެ ބޮޑުވަޒީރު ޑރ. މަހާތީރު މުހައްމަދުގެ އަނބިކަނބަލުން ސިތީ ހަސްމާ މުހައްމަދު އަލީ، އުމުރުފުޅުން 100 އަހަރުގައި މިއަދު (28 ސެޕްޓެމްބަރު) އަވަހާރަވެއްޖެ އެވެ.

އެކަމަނާ އަވަހާރަވީ މެލޭޝިޔާގެ ނޭޝަނަލް ހާޓް އިންސްޓިޓިއުޓްގައި، އެ ގައުމުގެ ގަޑިން ހެނދުނު 9:20 އެހައިކަންހާއިރު ކަމަށް އެ ގައުމުގެ މީޑިއާތަކުން ރިޕޯޓްކުރެ އެވެ.

ސިތީ ހަސްމާއަކީ ޑޮކްޓަރެކެވެ. އެކަމަނާ ވަނީ ބޮޑުވަޒީރުގެ އަނބިކަނބަލުންގެ ހައިސިއްޔަތުން، މައިންގެ ދުޅަހެޔޮކަމާއި، އާއިލާ ރޭވުމާއި، އަކުރު އުނގަންނައިދިނުމާއި، މަސްތުވާތަކެއްޗާ ދެކޮޅަށް މަސައްކަތްކުރުމުގެ އިތުރުން ނަފްސާނީ ދުޅަހެޔޮކަމަށް ހޭލުންތެރިކަން އިތުރުކުރުމަށް ގިނަގުނަ މަސައްކަތްތަކެއް ކުރައްވާފަ އެވެ.

އެކަމަނާގެ 100 ވަނަ އުފަންދުވަސް ފާހަގަކުރެއްވީ މިއަހަރުގެ ޖުލައި މަހުގެ 12 ވަނަ ދުވަހު އެވެ. އޭގެ ފަހުން އޮގަސްޓް މަހު، އޭސިއާން ރެކޯޑްސްއިން ވަނީ އެކަމަނާއަކީ ދުނިޔޭގައި ހުންނެވި ކުރީގެ ބޮޑުވަޒީރެއްގެ އެންމެ ދޮށީ އަނބިކަނބަލުންގެ ގޮތުގައި ބަލައިގެންފަ އެވެ.

ސިތީ ހަސްމާ އަވަހާރަވުމާ ގުޅިގެން މެލޭޝިޔާގެ ރަސްގެފާނު ސުލްތާން އިބްރާހީމް ސުލްތާން އިސްކަންދަރު ވަނީ ފޭސްބުކް މެދުވެރިކޮށް ތައުޒިޔާ ފޮނުއްވާފަ އެވެ. ރަސްގެފާނުގެ މެސެޖުގައި، އެކަމަނާގެ އާއިލާއަށް ކެތްތެރިކަން ދެއްވުން އެދި ދުއާކުރައްވާފައިވެ އެވެ.

މަހާތީރު މުހައްމަދު (101 އަހަރު) ވަނީ ދެ ފަހަރެއްގެ މަތިން މެލޭޝިޔާގެ ބޮޑުވަޒީރުކަން ކުރައްވާފަ އެވެ. އެއީ 1981 އިން 2003 އަށް އަދި 2018 އިން 2020 އަށެވެ.

ސިތީ ހަސްމާ އާއި މަހާތީރު ކައިވެނި ބައްލަވައިގަތީ 1956 ވަނަ އަހަރު އެވެ. މިދިޔަ އޮގަސްޓް މަހު އެ ދެކަނބަލުން ވަނީ ކައިވެންޏަށް 70 އަހަރު ފުރުން ފާހަގަކުރައްވާފަ އެވެ. އެ ދެކަނބަލުން ފުރަތަމަ ބައްދަލުވީ ސިންގަޕޫރުގެ ކިންގް އެޑްވަޑް ކޮލެޖް އޮފް މެޑިސިންގައި މެޑިކަލް ދަރިވަރުންގެ ގޮތުގައި ކިޔަވަން އުޅުއްވި ދުވަސްވަރު އެވެ.

2016 ވަނަ އަހަރު ޝާއިއުކުރި އެކަމަނާގެ ހަޔާތުނާމާ "މައި ނޭމް އިޒް ހަސްމާ" ގައި، ޑރ. މަހާތީރަކީ އެކަމަނާގެ "ހީރޯ" އެއްގެ ގޮތުގައި ސިފަކުރައްވާފައިވެ އެވެ. އަދި ފިޒިކްސް އާއި ކެމިސްޓްރީ ފަދަ މާއްދާތަކުން އުނދަގޫތަކާ ކުރިމަތިވި ދުވަސްވަރު މަހާތީރު ދެއްވި އެހީތެރިކަން އެކަމަނާ ފާހަގަކުރެއްވި އެވެ.

ސެލަންގޯއަށް އުފަން ސިތީ ހަސްމާ ކިޔަވައިވިދާޅުވުމަށްފަހު، މަހާތީރުގެ އުފަން ރަށް ކެޑާގައި ސަރުކާރުގެ މެޑިކަލް އޮފިސަރެއްގެ މަގާމު އަދާކުރެއްވި ފުރަތަމަ އަންހެން ބޭފުޅާއަށް ވެވަޑައިގަތެވެ.

އެ ދެކަނބަލުންގެ ހަތް ބޭފުޅުން ތިއްބަވަ އެވެ. އޭގެ ތެރޭގައި އިޖުތިމާއީ ހަރަކާތްތެރިޔާ އަދި ލިޔުންތެރިޔާ މަރީނާ މަހާތީރު އާއި، ކެޑާގެ ކުރީގެ ޗީފް މިނިސްޓަރު މުހްރިޒް މަހާތީރު ހިމެނިވަޑައިގަންނަވަ އެވެ.