އޮޅުވާލައިގެން ރާއްޖެއަށް ވަގަށް އެތެރެކުރި 8 މިލިއަނަށް ވުރެ ގިނަ ސިނގިރޭޓް ކަސްޓަމްސްއިން އަތުލައިގެންފި އެވެ.

ކަސްޓަމްސް އިން ބުނިގޮތުގައި މި ސިނގިރޭޓުތައް އަތުލައިގަތީ ކަނޑުމަގުން ރާއްޖެއަށް އެތެރެކުރި ޝިޕްމަންޓެއްގެ ތެރެއިންނެވެ.

‏ކަސްޓަމްސްއިން ބުނީ މިދިޔަ އާދީއްތަ ދުވަހު މާލެ ވިޔަފާރި ބަނދަރުގައި، ހިންގި ހާއްސަ އޮޕަރޭޝަނެއްގައި "ޖެނެރަލް ކާގޯ"ގެ ގޮތުގައި ޑިކްލެއާ ކޮށްފައިވާ ޝިޕްމަންޓެއް ބަލައި ފާސްކުރުމުގެ ތެރޭގައި ގިނަ އަދަދެއްގެ ސިނގިރޭޓް ފޮރުވާފައި ހުއްޓާ ފެނިފައިވާ ކަމަށެވެ.

އެގޮތުން ޖުމްލަ 8،527،480 ސިނގިރޭޓް ސްޓިކްސް ހޯދައި، ކަސްޓަމްސްގެ ބެލުމުގެ ދަށަށް މިހާރު ގެންގޮސްފައިވާ ކަމަށް ވެސް ކަސްޓަމްސް އިން ބުނެ އެވެ. އެއީ 426،374 ފޮށި ސިނގިރޭޓެވެ. ނުވަތަ 42،00 އަށް ވުރެ ގިނަ ކާޓަން އެވެ.

މި މައްސަލަ އިތުރަށް ތަހުގީގު ކުރަމުން އަންނަ ކަމަށް ކަސްޓަމްސްއިން ބުނެ އެވެ. ނަމަވެސް މިތަކެތި އެތެރެ ކުރީ ކޮން ބައެއް ކަމެއް ކަސްޓަމްސް އިން ނުބުނެ އެވެ.

ދުންފަތުގެ ގާނޫނު އޮންނަ ގޮތުން، އެތެރެކުރާ ކޮންމެ ސިނގިރޭޓަކުން 4 ރުފިޔާ ޑިއުޓީގެ ގޮތުގައި މިހާރު ނަގަ އެވެ. ދުންފަތުގެ ގާނޫނުގެ ދަށުން ޑިއުޓީ މިދިޔަ އަހަރު ބޮޑުކުރުމުން ގިނަ އަދަދެއްގެ ސިނގިރޭޓު ވަގަށް އެތެރެކުރަން އުޅެނިކޮށް އަތުލައިގެންފަ އެވެ.

އެގޮތުން މިދިޔަ އަހަރު ކުރީކޮޅު ދަ ހޯކްސް އިން ރާއްޖެ އަށް 200 މާސްޓާ ކާޓަން މެންޗެސްޓާ ސިނގިރޭޓް ވަގަށް އެތެރެކުރި މައްސަލައެއް ފުލުހުންނާއި މޯލްޑިވްސް ކަސްޓަމްސް ސާވިސްއިން ގުޅިގެން ތަހުގީގު ކުރި އެވެ. ނަމަވެސް އެ ތަހުގީގަށް ވީ ގޮތެއް މިހާތަނަށް އެނގިފައެއް ނުވެ އެވެ.

އެ މައްސަލައިގައި ފުލުހުން ތުހުމަތު ކުރީ ކަސްޓަމްސްގެ ގާނޫނު ގެ 97 ވަނަ މާއްދާގެ ދަށުން ދިވެހިރާއްޖެއަށް ސިއްރުން މުދާ އެތެރެކުރަން އުޅުމުގެ ކުށާއި، މަނީ ލޯންޑްރިން އަދި ޓެރަރިޒަމަށް ފައިނޭންސް ކުރުން ހުއްޓުވުމުގެ ގާނޫނުގެ 53 ވަނަ މާއްދާގެ ދަށުން މަނީ ލޯންޑްރިން ކުށެވެ.