ރައްޔިތުންގެ މަޖިލީހުގެ މެޖޯރިޓީ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާހުގެ ނަމުގައި ޑޮލަރު ގަނެވިއްކާ ކުންފުންޏެއް އުފައްދަވާފައިވާކަން އޭނާގެ މާލީ ބަޔާނުން ހާމަވެއްޖެ އެވެ.

ވިހި ވަނަ މަޖިލީހުގެ މެންބަރުންގެ ދެވަނަ އަހަރުގެ މާލީ ބަޔާން މަޖިލީހުގެ ވެބްސައިޓުގައި އާންމުކޮށްފައި ވާއިރު، ފަލާހުގެ ބަޔާނުން އެނގޭ ގޮތުގައި މިދިޔަ އަހަރުގެ ތެރޭގައި އޭނާ ވަނީ ދެ ކުންފުންޏެއް އުފައްދަވާފަ އެވެ. އެއީ "ސަން ކަރަންސީ އެކްސްޗޭންޖު" ގެ ނަމުގައި އުފެއްދި މާލީ ކުންފުންޏާއި "ސަން ކްރަފްޓް ކޮންސްޓްރަކްޝަން" ގެ ނަމުގައި އުފެއްދި ކޮންސްޓްރަކްޝަން ކުންފުންޏެވެ. މި ދެ ކުންފުނީގެ ވެސް 90 އިންސައްތަ ހިއްސާ އޮންނަނީ ފަލާހުގެ އެވެ.

އިތުރު ތިން ކުންފުންޏެއްގެ ހިއްސާ ވެސް ބަލަހައްޓަވަމުންދާ ފަލާހަށް މިދިޔަ އަހަރު މަޖިލީހުގެ މުސާރައިގެ ގޮތުގައި 990,000 ރުފިޔާ ލިބިވަޑައިގެންނެވި އެވެ. މީގެ އިތުރުން ވިޔަފާރީގެ ނަފާގެ ގޮތުގައި 1.8 މިލިއަން ރުފިޔާ އަދި ކުލީގެ ގޮތުގައި 2.8 މިލިއަން ރުފިޔާ އޭނާއަށް ވަނީ އާމްދަނީގެ ގޮތުގައި ލިބިވަޑައިގެންފަ އެވެ. އަދި މިދިޔަ އަހަރުގެ ތެރޭގައި ބޭންކް އޮފް މޯލްޑިވްސް މެދުވެރިކޮށް 15 މިލިއަން ރުފިޔާގެ ލޯނެއްވެސް ފަލާހު ނަންގަވާފައިވެ އެވެ.

މާލީ ބަޔާނުގައިވާ ގޮތުން ފަލާހުގެ ނަމުގައި ޖުމްލަ ފަސް ބިމެއް އޮތްއިރު، އޭގެ ތެރޭގައި މިދިޔަ އަހަރު 21 މިލިއަން ރުފިޔާއަށް ހުޅުމާލެއިން ގަނެފައިވާ ބިމެއް ހިމެނެ އެވެ. މީގެ އިތުރުން ރ. އިންނަމާދޫގެ ތިން ބިމަކާއި، މާލެއިން ހަތަރު މިލިއަން ރުފިޔާއަށް ގަނެފައިވާ މ. އަސުރުކުރި އަކީ ވެސް އޭނާގެ މިލްކިއްޔާތުގައިވާ ބިންތަކެވެ.