ފިޖީގެ ސުވާ ހައި ކޯޓުގައި ޝަރީއަތުގެ ހެއްކެއްގެ ގޮތުގައި ރައްކާކޮށްފައި ހުރި 40 ކިލޯގްރާމްގެ ކޮކެއިން ވަގަށް ނަގައި، އޭގެ ބަދަލުގައި ފުށް އަޅާފައިވާ މައްސަލައެއް ފަޅާއަރައި، އެ ގައުމުގެ ފުލުހުން ސީރިއަސް ތަހުގީގެއް ފަށައިފި އެވެ.

ގެއްލިފައިވާ މަސްތުވާތަކެއްޗަކީ ގާތްގަނޑަކަށް 13.3 މިލިއަން އެމެރިކާ ޑޮލަރު (30 މިލިއަން ފިޖީ ޑޮލަރު) ގެ އަގުހުރި ތަކެއްޗެވެ. މިއީ މަސްތުވާތަކެތި ގެންގުޅުމުގެ ކުށް ސާބިތުވެފައިވާ، ފިޖީ އަދި ކެނެޑާއަށް ނިސްބަތްވާ ޖޯޝުއާ ރަހްމާންގެ އަތުން 2019 ވަނަ އަހަރު އަތުލައިގަތް ތަކެއްޗެވެ. މި މައްސަލައިގެ އިސްތިއުނާފު މަރުހަލާ ނިމެންދެން އެ ތަކެތި ރައްކާކޮށްފައި ހުރީ ހައި ކޯޓުގެ ރައްކާތެރި ވޯލްޓެއްގަ އެވެ.

ފިޖީ ފުލުހުން ހާމަކުރި ގޮތުގައި، މި ވައްކަން ފަޅާއެރީ މި މަހުގެ 15 ވަނަ ދުވަހު ހިންގި ހާއްސަ އިންސްޕެކްޝަނެއްގެ ތެރެއިންނެވެ. ފުރަތަމަ ފާހަގަކުރެވުނީ 39 ކޮކެއިން ބާރުގެ ތެރެއިން ހަތް ބާރު މަދުކަމެވެ. ނަމަވެސް، އިތުރަށް ބަލައި ފޮރެންސިކް ތަހުލީލުތައް ހެދުމުން އެނގުނީ އެތަނުގައި ހުރި އެއްވެސް ބާރެއްގައި އަސްލު ކޮކެއިން ނެތް ކަމާއި، އޭގެ ބަދަލުގައި އަޅާފައި ހުރީ ފުށް ކަމެވެ.

ފުލުހުންގެ ކޮމިޝަނަރު ރޫސިއާޓޭ ޓުޑްރާވޫ ނޫސްވެރިންނަށް މައުލޫމާތު ދެއްވަމުން ވިދާޅުވީ، 2021 ވަނަ އަހަރުގެ މާޗު މަހު ވޯލްޓަށް ލެވުނު މި ތަކެތި ވަގަށް ނެގީ ކޮން އިރަކު ކަމެއް އަދި ސާފެއް ނުވެއެވެ. ނަމަވެސް އެ ވޯލްޓަށް ވަނުމުގެ ހުއްދަ އޮތް ޝަރުއީ ދާއިރާގެ ހަ މުވައްޒަފަކަށް މިހާރު ތަހުގީގު އަމާޒުކޮށްފައިވާ ކަމަށާއި، އޭގެ ތެރެއިން އެކަކު މިހާރު ހުރީ ގައުމުން ބޭރުގައި ކަމަށް ކޮމިޝަނަރު ވިދާޅުވި އެވެ. މި މައްސަލައާ ގުޅިގެން ކޯޓުގައި ހުރި އެހެން ހެކިތަކާއި ފައިސާތައްވެސް ފުލުހުން ދަނީ ޗެކްކުރަމުންނެވެ.

މި ހާދިސާއާ ގުޅިގެން ފިޖީގެ ޝަރުއީ ނިޒާމުގެ ރައްކާތެރިކަމާމެދު ބޮޑެތި ސުވާލުތަކެއް ވަނީ އުފެދިފަ އެވެ. ގާނޫނުހަދާ މަޖިލީހުގެ އިދިކޮޅު މެންބަރު ޖޯން އުސަމާޓޭ ވިދާޅުވީ މިއީ ކޯޓުތަކުގެ އިތުބާރު ގެއްލޭ ފަދަ ހިތާމަވެރި އަމަލެއް ކަމަށެވެ. އަދި ޖަސްޓިސް މިނިސްޓަރު ސިރޯމީ ޓުރާގާ ވިދާޅުވީ، މިކަމުގެ ސަބަބުން ކޯޓުތަކުގެ ސަލާމަތީ އުސޫލުތައް ހަރުދަނާކުރުމުގެ މަސައްކަތް މިހާރު ފަށާފައިވާ ކަމަށެވެ.

ފިޖީއަކީ އެމެރިކާ ބައްރުން އޮސްޓްރޭލިއާ އާއި އޭޝިއާ ސަރަހައްދަށް މަސްތުވާތަކެތި ޓްރެފިކް ކުރުމުގައި ބޭނުންކުރާ މައިގަނޑު އެއް މަގަށް ވާއިރު، އެ ގައުމުގައި މަސްތުވާތަކެތީގެ ވަބާ ބޮޑުވެ، ދާދި ފަހުން ވަނީ ގައުމީ ކުއްލި ނުރައްކަލުގެ ހާލަތުވެސް އިއުލާންކޮށްފަ އެވެ. މިއީ މި އަހަރު ފިޖީގެ ބެލުމުގެ ދަށުގައި ހުރި މަސްތުވާތަކެތި ގެއްލުނު ދެވަނަ ފަހަރެވެ. މީގެ ކުރިން މިދިޔަ މާޗު މަހުވެސް 12 ކިލޯގެ ކޮކެއިން ވަނީ ގެއްލިފަ އެވެ.