މަދީނާގައި ހުންނަ މަސްޖިދުއް ނަބަވީއަށް ކަރަންޓު ފޯރުކޮށްދޭ ޕަވާ ސްޓޭޝަނަށް ހޫތީން ހަމަލާދީފައިވާ ކަމަށް ސައުދީ އިސްވެ އޮންނަ ކޯލިޝަނުން ބުނެފި އެވެ.

ކޯލިޝަނުން ބުނި ގޮތުގައި މި ހަމަލާގެ ސަބަބުން އެއް ޓްރާންސްފޯމަރު ބޭނުންނުކުރެވޭ ވަރަށް ހަލާކުވި ނަމަވެސް، މުޅި ކަރަންޓު ނެޓްވޯކަށް އޭގެ އަސަރެއް ކޮށްފައެއް ނުވެ އެވެ. ނަމަވެސް ހޫތީންގެ ބާރުގެ ދަށުގައި އޮންނަ ސަބާ ނިއުސް އެޖެންސީން ރިޕޯޓުކޮށްފައިވާ ގޮތުގައި، އެ ޖަމާއަތުގެ އަސްކަރީ މަސްދަރަކުން ވަނީ ކޯލިޝަނުގެ މި ވާހަކަތައް ދޮގުކޮށްފަ އެވެ.

މީގެ އިތުރުން، ސައުދީން ޔަމަނުގެ ވެރިރަށް ސަންއާ އަށާއި އެހެނިހެން ސަރަހައްދުތަކަށް ވައިގެ ހަމަލާތަކެއް ދީފައިވާ ކަމަށް ހޫތީން ފަހުން ރިޕޯޓުކޮށްފައިވާއިރު، ސައުދީން އަދި ރަސްމީކޮށް އެކަން ކަށަވަރުކޮށްދީފައެއް ނުވެ އެވެ. ބައިނަލްއަގުވާމީ ގޮތުން ގަބޫލުކުރާ ޔަމަނު ސަރުކާރާ ގުޅިފައިވާ އަސްކަރިއްޔާގެ ތަރުޖަމާނަކު ވިދާޅުވީ، ކޯލިޝަން ފައުޖުތަކުން ސަންއާގައި ހުރި މުހިންމު އަމާޒުތަކަކަށް ހަމަލާދީފައިވާ ކަމަށެވެ. އެހެންނަމަވެސް އެކަމުގެ އިތުރު ތަފްސީލެއް ދީފައެއް ނުވެ އެވެ.

ދާދި ފަހުން ހަނގުރާމަ ވަރުގަދަވެފައި މިވަނީ، 2022 ވަނަ އަހަރު އދ. މެދުވެރިވެގެން ގާއިމުކުރި ހަނގުރާމަ ހުއްޓާލުމުގެ އެއްބަސްވުމަށްފަހު، ސައުދީ އަރަބިއްޔާއާއި ހޫތީންނާ ދެމެދު ކުރިމަތިލުންތައް މަދުވެފައި އޮތުމަށްފަހު އެވެ. މި އަހަރުގެ ޖުލައި މަހު ހޫތީން ސައުދީއާ ދެކޮޅަށް ކަނޑުގެ މަގުން ދަތިކުރުމުގެ ފިޔަވަޅުތައް އިއުލާންކޮށް، ސައުދީގެ ބިންތަކަށާއި މުދާ އުފުލާ ބޯޓުތަކަށް ހަމަލާދޭން ފެށުމާއެކު މަޝްރަހު އަނެއްކާވެސް ވަނީ ގޯސްވެފަ އެވެ. މީގެ އިތުރުން ޔަމަނުގެ ރަތްކަނޑުގެ އައްސޭރިފަށުގެ ބޮޑު ސަރަހައްދެއްވެސް ހޫތީން ވަނީ އެމީހުންގެ ބާރުގެ ދަށަށް ގެންގޮސްފަ އެވެ.

މީގެ ރައްދުގައި ސައުދީން ދަނީ ޔަމަނަށް ވައިގެ ހަމަލާތައް ދެމުންނެވެ. އަދި ހޫތީންގެ ކުރިއެރުންތައް ހުއްޓުވުމަށް މަސައްކަތްކުރާ ޔަމަނު ސަރުކާރުގެ ފައުޖުތަކަށް ސައުދީން ދަނީ އެހީތެރިކަން ފޯރުކޮށްދެމުންނެވެ.

ސައުދީ ކޯލިޝަނުން ބުނި ގޮތުގައި، މަދީނާގެ ޕަވާ ސްޓޭޝަނަށް ދިން ހަމަލާގައި ބޭނުންކުރި ޑްރޯންގެ ބައިތައް ތަހުގީގުކުރުމުން، އެ ހަމަލާ ރޭވުމުގައާއި ހިންގުމުގައި ހޫތީން ބައިވެރިވިކަން ވަނީ ކަށަވަރުވެފަ އެވެ. އެހެންނަމަވެސް ހޫތީންގެ އަސްކަރީ މަސްދަރަކުން ސަބާ ނިއުސް އެޖެންސީއަށް ބުނީ، މިއީ މައްކާއަށް ހޫތީން ހަމަލާދޭން އުޅުނު ކަމަށް ބުނެ ސައުދީން ކުރިން ކުރި ތުހުމަތުތައް ސާބިތުކޮށްނުދެވުމުން، އެކަން ފޮރުވުމަށް ދައްކާ "ދޮގު" ވާހަކަތަކެއް ކަމަށެވެ.

މީގެ ދެ ހަފުތާ ކުރިން ސައުދީން ބުނެފައިވަނީ މައްކާގެ ދެކުނުން، އެ ސިޓީގެ ވައިގެ ސަރަހައްދަށް ވަންނަން އުޅުނު ހޫތީންގެ ޑްރޯނެއް ވައްޓާލާފައިވާ ކަމަށެވެ. ކޯލިޝަނުން ސިފަކުރި ގޮތުގައި މިއީ 2017 ވަނަ އަހަރަށްފަހު މައްކާއަށް އަމާޒުކޮށް ހޫތީން ދޭން އުޅުނު ދެވަނަ ހަމަލާ އެވެ. ނަމަވެސް ހޫޘީން ވަނީ މައްކާ ނުވަތަ އިސްލާމީ އެއްވެސް މުގައްދަސް ބިނާއަކަށް ހަމަލާދޭން އުޅުނުކަމަށް ބުނާ ވާހަކަތައް ދޮގުކޮށްފަ އެވެ.

ކޯލިޝަނުން ތުހުމަތުކުރާ ގޮތުގައި މަދީނާއަށް ދިން ހަމަލާއަކީ ހަރަމައިން ޝަރީފައިންނަށް އަމާޒުކޮށް، ދުނިޔޭގެ މުސްލިމުންގެ ޖަޒުބާތުތަކާ ކުޅުމަށް ހޫތީން ކުރަމުންދާ މަސައްކަތްތަކުގެ ބައެކެވެ. އަދި މުގައްދަސް ބިނާތަކާއި ހައްޖުވެރިންނާއި އުމްރާވެރިން ހިމާޔަތްކުރުމަށް އަޅަންޖެހޭ ހުރިހާ ފިޔަވަޅެއް އަޅަމުންދާނެ ކަމަށްވެސް ކޯލިޝަނުން ބުނެފައިވެ އެވެ.

މީގެ އިތުރުން، ސައުދީގެ ދެކުނުގެ ސިޓީއެއް ކަމަށްވާ ޚަމީސް މުޝައިތަށް އަމާޒުކޮށް ހޫތީން ފޮނުވާލި ބެލިސްޓިކް މިސައިލެއްވެސް ވައްޓާލާފައިވާ ކަމަށް ކޯލިޝަނުން ބުންޏެވެ. މި ހަމަލާގައި އެއްވެސް މީހަކަށް އަނިޔާވިކަމެއް ނުވަތަ ލިބުނު ގެއްލުމުގެ ތަފްސީލެއް އަދި ހާމަކޮށްފައެއް ނުވެ އެވެ.

ލޯކަލް އޮފިޝަލުން ހުކުރު ދުވަހުގެ ހެނދުނު ބުނި ގޮތުގައި، އަދަނުގައި ހުންނަ ސައުދީ ކޯލިޝަން ފައުޖުތަކުގެ ކޮމާންޑް ހެޑްކުއާޓާރަށްވެސް ހޫތީން ވަނީ ބެލިސްޓިކް މިސައިލާއި ޑްރޯން ބޭނުންކޮށްގެން ހަމަލާދީފަ އެވެ.