ދުނިޔޭގެ ނަފްސާނީ ސިއްހަތުގެ ދުވަހާ ގުޅުވައިގެން، އޮސްޓްރޭލީއާ މޯލްޑިވްސް ފްރެންޑްޝިޕް އެސޯސިއޭޝަން (އަމްފާ) ގެ ފަރާތުން ހާއްސަ ވެބިނާރެއް ބާއްވައިފި އެވެ.

ރޭ 8:30 އިން 10:00 އަށް ކާމިޔާބުކަމާއިކު އެ ވެބިނާ ބޭއްވީ "މައިންޑް މެޓާސް: ވޯލްޑް މެންޓަލް ހެލްތު ޑޭ 2026" ގެ ނަމުގަ އެވެ.

އެ ވެބިނާރުގެ މައިގަނޑު މައުޟޫއަކީ "ނަފްސާނީ ސިއްހަތުގެ ދާއިރާގައި މަސައްކަތްކުރާ ފަންނީ މާހިރުންނާއި، އެކަމުގެ ތަޖުރިބާ ލިބިފައިވާ ފަރާތްތަކުގެ ހަޔާތުގެ ތަޖުރިބާގެ މުހިންމުކަން" އެވެ.

މި ވެބިނާރު ފައްޓަވައިދެއްވުމުގެ ގޮތުން އޮސްޓްރޭލިއާ އިން ރާއްޖެއަށް ކަނޑައަޅާފައި ހުންނަ ހައި ކޮމިޝަނަރު، ޑޭވިޑް ޖެސަޕްގެ ރެކޯޑްކުރެވިފައިވާ ބަޔާނެއް އިއްވުނެވެ. އެ ބަޔާނުގައި ނަފްސާނީ ސިއްހަތުގެ ދާއިރާގައި މަސައްކަތް ކުރައްވާ ފަރާތްތަކުގެ އަގު ފާހަގަކުރައްވާ އަދި އަމްފާގެ މަސައްކަތްތަކަށް ތަޢުރީފު ކުރެއްވވާފައިވެ އެވެ.

މި ވެބިނާރުގައި މޮޑަރޭޓަރެއްގެ ގޮތުން ހަރަކާތްތެރިވެވަޑައިގަތީ ދިވެހިރާއްޖޭގެ ގައުމީ ޔުނިވާސިޓީގެ ބިހޭވިއަރަލް ސައިންސް ޑިޕާޓްމަންޓްގެ ސީނިއާ ލެކްޗަރާ ފާތިމަތު ނަޙުލާ އެވެ. އަދި ޕެނަލިސްޓުންގެ ގޮތުގައި ބައިވެރިވެވަޑައިގަތީ ދިވެހިރާއްޖޭގެ ގައުމީ ޔުނިވާސިޓީގެ ފެކަލްޓީ އޮފް ހެލްތު ސައިންސްގެ ޑީން ޑރ. އައިޝަތު ޝާނޫރާއި، ގައުމީ ނަފްސާނީ ސިއްހަތުގެ މަރުކަޒުގެ ލީޑް ސޯޝަލް ވޯކާ ފާތިމަތު ސޯފިޔާ ރަޝީދުގެ އިތުރުން، އެ މަރުކަޒުގެ ސީނިއާ ކޮންސަލްޓަންޓް ސައިކޭޓްރިސްޓް ޑރ. އާރިފް މުހައްމަދެވެ.

ވެބިނާރުގައި ވާހަކަދައްކަވަމުން ޑރ. އާރިފް ފާހަގަކުރެއްވި ގޮތުގައި، ބަލީގެ ފަރުވާއާއި ފަރުވާއާއިގުޅޭ ނިންމުންތަކުގައި، ބަލިމީހުންނާއި އެމީހުން ބަލަހައްޓާ ފަރާތްތަކުގެ ބައިވެރިވުމަކީ ނުހަނު ބޭނުންތެރި އަދި މުހިންމުކަމެކެވެ. އަދި އެއާއެކު، ހިދުމަތްތައް ތަރައްގީ ކުރުމާއި، ބަލިތަކުން ރައްކާތެރިވުމާއި ހޭލުންތެރިކަން އިތުރު ކުރުމުގެ މަސައްކަތްތަކުގެ އިތުރުން ނިޒާމުތައް ބިނާކުރުމުގައިވެސް އެ ފަރާތްތަކުގެ ބައިވެރިވުމާއި ތަޖުރިބާ ހިމެނުމަކީވެސް ވަރަށް މުހިންމުކަމެއް ކަމަށް ޑރ. އާރިފު ވިދާޅުވި އެވެ.

ވެބިނާގެ ޕެނަލިސްޓް އަދި ސޯޝަލް ވޯކާ ފާތިމަތު ސޯފިޔާ ރަޝީދު ދެއްކެވި ވާހަކައިގައި، ނަފްސާނީ ދައްޗަކާ ނުވަތަ ބައްޔަކާ ކުރިމަތިލާ ވަގުތު އިންސާނާގެ ދިރިއުޅުގެ އެކިއެކި ކަންކަމަށް ނުފޫޒު ފޯރުވެގެން ދާކަން ފާހަގަކުރެއްވި އެވެ. މި ނުފޫޒަކީ މީހާގެ ކެތްތެރިކަން (ރެޒިލިއަންސް) އިތުރުކޮށްދޭ ނުވަތަ ހާސްކަން ބޮޑުކުރުވާ ކަންކަމަށް ވެދާނެކަމަށްވެސް ފާހަގަކުރެއްވި އެވެ. އެހެންކަމުން، ނަފްސާނީ ގޮތުން ދަތިތަކާ ކުރިމަތިލާ ފަރާތްތަކުގެ ދިރިއުޅުން ރަނގަޅުކުރުމަށް ވިސްނާނަމަ، ފަރުދީ ފެންވަރުގައާއި، މުޖުތަމަޢުގެ ފެންވަރުގައާއި، އަދި ސިޔާސީ ނުވަތަ ގައުމީ ފެންވަރުގައި ފިޔަވަޅުތައް އަޅަން ޖެހެ އެވެ. އަދި އެފަދަ ފަރާތްތަކަށް ހާއްސަކޮށްގެން ޕްރޮގްރާމްތަކާއި ފަރުވާގެ ނިޒާމުތައް ފަރުމާކުރާއިރު، އެމީހުންގެ އަޑާއި ތަޖުރިބާތައް ހިމެނައިގެން އެކަންކަން ކުރުމަކީ މުހިންމު ކަމެއްކަމަށް އޭނާ ބާރުއެޅުއްވި އެވެ.

ދުނިޔޭގެ ނަފްސާނީ ސިއްހަތުގެ ދުވަސް ފާހަގަ ކުރުމުގެ ގޮތުން އަމްފާއިން ވަނީ މިދިޔަ އަހަރުވެސް ވެބިނަރއެއް ބާއްވާފަ އެވެ. މި އަހަރުގެ ދުނިޔޭގެ ނަފްސާނީ ޞިއްޙަތުގެ ދުވަސް ފާހަގަ ކުރުމުގެ ގޮތުން އެންމެ ފުރަތަމަ ހަރަކާތެއް މި ބޭއްވީ އަމްފާއިންނެވެ.