ރާއްޖޭގެ ހިންގުމުގެ ނިޒާމަށާއި ގާނޫނުއަސާސީއަށް ބޮޑެތި ބަދަލުތަކެއް ގެނައުމަށް ކުރީގެ އިކޮނޮމިކް މިނިސްޓަރު ފައްޔާޒު އިސްމާއީލް ހުށަހެޅުއްވި "ބޮޑު ބަދަލު" ކަރުދާސް އެ ޕާޓީގެ ކޮންގްރެސް އިން މިއަދު ފާސްކޮށްފި އެވެ.

މިއަދު ހަވީރު ނެގި ވޯޓުގައި އެ ކަރުދާސް ފާސްވެފައި ވަނީ 520 ވޯޓުންނެވެ. އެ ކަރުދާސް ފާސްވުމާއެކު ބޮޑު ބަދަލުގައި ހުރި ސިޔާސަތުތަކަކީ އެމްޑީޕީން ގަބޫލުކުރާ ސިޔާސަތުތަކަށް ވީ އެވެ.

ބޮޑު ބަދަލު ކަރުދާހުގައި ހިމެނޭ އެންމެ ބޮޑު ބަދަލަކީ، ދައުލަތުގެ ވެރިޔަކާއި ސަރުކާރުގެ ވެރިޔަކު އިންތިހާބު ކުރުމެވެ. އެ ކަރުދާހުގައިވާ ގޮތުން، ސަރުކާރުގެ ވެރިޔާ އިންތިހާބު ކުރާނީ ރައްޔިތުންގެ ސީދާ ވޯޓަކުންނެވެ. އަދި ދައުލަތުގެ ވެރިޔާ އިންތިހާބު ކުރާނީ މަޖިލީސް މެންބަރުންނާއި ކައުންސިލަރުން ހިމެނޭ ބޮޑު މަޖިލީހުން ނަގާ ވޯޓަކުންނެވެ.

ސުޕްރީމް ކޯޓުގެ ފަނޑިޔާރުން ރައްޔިތުންގެ ވޯޓަކުން ނޫނީ ވަކިނުކުރެވޭގޮތް ހެދުން ވެސް ބޮޑު ބަދަލުގެ ތެރޭގައި ހިމެނެ އެވެ. މީގެއިތުރުން މިނިވަންމުއައްސަސާތަކަށް މެންބަރުން އައްޔަންކުރުމުގެ ބާރު ރައީސުލްޖުމްހޫރިއްޔާ އާއި ރައްޔިތުންގެ މަޖިލީހަށް ނޯންގޮތް ހެދުން ވެސް އޭގެތެރޭގައި ހިމެނެ އެވެ.

ރައްޔިތުންގެ މަޖިލީހުގެ ދާއިރާތައް އުވާލައި މުޅި އަތޮޅުގެ ރައްޔިތުން ވޯޓުދީގެން މެންބަރުން އިންތިހާބު ކުރާގޮތަށް ހެދުމާއި އަންހެނުންނަށް ހާއްސަ މަޖިލިސް ގޮނޑިތަކެއް ހަމަޖެއްސުން ވެސް ބޮޑު ބަދަލުގައި ހިމެނެ އެވެ.

ރައްޔިތުންގެ މަޖިލީހުގެ މެންބަރުންގެ އަދަދު ކޮންމެ ފަސް އަހަރަކުން އިތުރުވާ އިތުރުވުން ނިމުމަކަށް ގެނެސް، މެންބަރުންގެ އަދަދު އެއްވަރެއްގައި ހިފެހެއްޓުމަކީ ވެސް ބޮޑު ބަދަލުގެ ސިޔާސަތެކެވެ.

ރިޔާސީ ޕްރައިމަރީގައި ވާދަކުރައްވާނެކަން އިއުލާންކުރައްވާފައިވާ ފައްޔާޒު ގެންދަވަނީ ރާއްޖެއަށް ގެންނަން އޭނާ ހުށަހަޅުއްވާ އިސްލާހީ ބަދަލުތައް ކިޔައިދެއްވުމަށްޓަކައި ޕާޓީގެ އެކި ދާއިރާތަކުގެ މެންބަރުންނާއެކު ބައްދަލުވުންތައް ބާއްވަމުންނެވެ.