މިހާރުގެ ސަރުކާރު ޖަވާބުދާރީކުރުވުމުގައި އިދިކޮޅު އެންމެ ބޮޑު ޕާޓީ، އެމްޑީޕީން މިހާތަނަށް އެކަށީގެންވާ މަސައްކަތެއް ކޮށްފައި ނުވާ ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.

އައްޑޫ ފޭދޫގައި ބޭއްވި ޕީއެންއެފްގެ ޖަލްސާގައި އެމަނިކުފާނު ވިދާޅުވީ ރާއްޖޭގައި ގާއިމުވެފައި އޮތް އިދިކޮޅު އެންމެ ވަރުގަދަ ސިޔާސީ ޕާޓީއަކީ އެމްޑީޕީ ކަމަށްވާއިރު، މިއަށްވުރެ ބޮޑަށް އެ ޕާޓީން ހަރަކާތްތެރިވާން ބޭނުންފުޅުވާ ކަމަށެވެ. އަދި ސަރުކާރު ޖަވާބުދާރީކުރުވުމަށް މީގެކުރިން އެމްޑީޕީން ދެއްކި ރީތި ނަމޫނާއާއި ކުރި ހިތްވަރު މިހާރު ނުފެންނަ ކަމަށްވެސް އެމަނިކުފާނު ފާހަގަކުރެއްވި އެވެ.

"އަޅުގަނޑު ބޭނުންވޭ މިއަށްވުރެ ބޮޑަށް އެމްޑީޕީ ހަރަކާތްތެރިވާން. އެއީ ރާއްޖޭގައި އެސްޓާބްލިޝް ވެފައި އޮތް އިދިކޮޅު އެންމެ ވަރުގަދަ ޕާޓީއަކަށް މިއޮތީ އެމްޑީޕީ. އެކަމަކު އެމްޑީޕީއަށް މިހާތަށް އެކަށީގެންވާ މަސައްކަތެއް ކުރެވިއްޖެހޭ މި ސަރުކާރު ޖަވާބުދާރީކުރުވަން. ނޫން. ނެތޭ ކުރެވިފަކާއެއް. ކޮބައިތޯ އެމްޑީޕީގެ މުޒާހަރާތައް. ކޮބައިތޯ އެމްޑީޕީގަ ކުރީގަ ހުރި ހިތްވަރު،" ޔާމީން ވިދާޅުވި އެވެ.

ޔާމީން އިތުރަށް ވިދާޅުވީ އެންޓި ކޮރަޕްޝަން ކޮމިޝަނުން މައްސަލަތައް ނުބަލައި ދޫކޮށްލާއިރުވެސް، އެކަމާ ދެކޮޅަށް އެމްޑީޕީން އެކަށީގެންވާ ފިޔަވަޅެއް އަޅާފައި ނުވާ ކަމަށެވެ. މީގެއިތުރުން ސަރުކާރުގެ އަމަލުތަކާ ދެކޮޅަށް އެމްޑީޕީން ކުރިން ކުރިއަށްގެންދިޔަފަދަ މުޒާހަރާތަކާއި ހަރަކާތްތައް މިހާރު ފެންނަން ނެތްކަމަށް އެމަނިކުފާނު ވިދާޅުވި އެވެ.

ސިޔާސީ ލީޑަރުންގެ އަމަލުތައް ހުރި ގޮތުން ރައްޔިތުން މިހާރު ތިބީ ސިޔާސީ ވެރިން ދެކެ ފޫހިވެފައި ކަމަށްވެސް ޔާމީން ވިދާޅުވި އެވެ. އެމަނިކުފާނު ފާހަގަކުރެއްވި ގޮތުގައި ސިޔާސީ ލީޑަރުންގެ ތެރޭގައި ހިމެނެނީ ހަމައެކަނި ރާއްޖޭގެ ރައީސްކަން ކުރައްވާފައިވާ ބޭފުޅުންނެއް ނޫނެވެ.

ރައީސް މުހައްމަދު މުއިއްޒާ ދެކޮޅަށް މަސައްކަތް ކުރައްވާ އިދިކޮޅު އެހެން ސިޔާސީ ލީޑަރުން ތިއްބެވީ ރައްޔިތުންގެ ފަޅީގައިތޯ ނުވަތަ އެހެން ދިމާލެއްގައިތޯވެސް ޔާމީން ވަނީ ސުވާލު އުފައްދަވާފަ އެވެ.

މިހާރު އޮތް ސަރުކާރުގެ ޒައާމަތުން ރައްޔިތުންނަށް ފައިދާހުރި ކަންތައްތަކެއް ނުވާކަން އާންމުން ގަބޫލުކުރާ ކަމަށް އެމަނިކުފާނު ވިދާޅުވިއެ ވެ. އަމިއްލަ މަންފާއަށްޓަކައި ބައެއް ސިޔާސީ ބޭފުޅުން ރައީސް މުއިއްޒުގެ ފަހަތްޕުޅުގައި ތިއްބެވުމަކީ ރައްޔިތުން ބާކީކޮށް ދޫކޮށްލުން ކަމަށްވެސް ޔާމީން ސިފަކުރެއްވި އެވެ.