ދިވެހި ޒުވާނުންތަކެއް ހިންގާ "މޯލްޑިވްސް ވިތު ފަލަސްތީން" ފޭސްބުކް ޕޭޖު ބަންދުކޮށް އެ ޕޭޖު ގެއްލުވާލައިފި އެވެ.

ފޭސްބުކުން އެ ޕޭޖު ގެއްލުވާލީ އިއްޔެ އެވެ. އެ ޕޭޖަށް 50،000އަށްވުރެ ގިިނަ ލައިކްސް ވަނީ ހަފްތާއެއްގެ ތެރޭގައި ލިބިފަ އެވެ.

އެޕޭޖުގެ އެޑްމިންކަން ކުރައްވާދިވެހި ޗެނަލްގެ ނޫސްވެރިޔާ މަރިޔަމް ޝިއުނާ އޮންލައިން ނޫސް "ސަން"އަށް ބުނީ އެ ޕޭޖް ފޭސްބުކުން ބޭންކޮށްލީ ޕަލަސްތީންއާ އެއްކޮޅަށް ބަސްބުނެ، އެގައުމުގެ ހާލަތު ދުނިޔެއަށް ފެންނަން ބޭނުން ނުވާތީ ކަމަށެވެ.

ޝިއުނާ ވިދާޅުވީ ޕަލަސްތީނުގެ ފޮޓޯތަށް ޕޯސްޓު ކުރާއިރު އެ ޕޯސްޓަކީ ހޭޓް ސްޕީޗެއްކަމަށް އަންގަން ފޭސްބުކުން ނޯޓިފިކޭޝަން ފޮނުވާ ކަމަށެވެ. މިއީ ފަލަސްތީންގެ މަސްރަހު ބައިނަލްއަގުވާމީ މުޖްތަމައުއަށް ފެންނަ ބޭނުން ނުވާތީ ފޭސްބުކުން ކުރާކަމެއް ކަމަށް ޝިއުނާ ވިދާޅުވި އެވެ.

މައިގަނޑު ގޮތެއްގައި އެ ޕޭޖުގެ ބޭނުމަކީ، ފަލަސްތީނުގެ ރައްޔިތުންނަށް ވެވެން އޮތް އެހީތެރިކަމެއްވެ، ރާއްޖެއަކީ ކިތަންމެ ކުޑަ ގައުމެއް ނަމަވެސް މި ގައުމުގެ ރައްޔިތުން ތިބީ ފަލަސްތީނުގެ މުސްލިމުންނާއެކުކަން މުޅި ދުނިޔެއަށް ދައްކާލުން ކަމަށެވެ. އަދި އަލުން ގުރޫޕު ހޯދުމުގެ މަސައްކަތްވެސް ކުރަމުން އަންނަ ކަމަށް ޝިއުނާ ބުންޏެވެ.

މިމަހު 15 ވަނަ ދުވަހު އުފެއްދި އެ ގުރޫޕުން، އިޒުރޭލުން ފަލަސްތީނަށް ދެމުން އަންނަ ހަމާލަތަކާ ދެކޮޅަށް އަޑުއުލުމަށްޓަކައި ރާއްޖޭގައި ބާއްވަމުން އަންނަ ހުރިހާ ހަރަކާތްތަކެއް ފޮޓޯ، ވީޑިއޯ އަދި އެންމެފަހުގެ މައުލޫމާތު ލިބެން ހުއްޓެވެ.

މޯލްޑިވްސް ވިތް ފަލަސްތީން ގުރޫޕު ގެއްލުވާލި އިރު، ސޯޝަލް މީޑިއާ ބައެއް ޕްލެޓްފޯމުތަކުން އިޒުރޭލްއާ ދެކޮޅު ހިޔާލުފާޅު ކުރާ މީހުންނާއި ޕޭޖުތަކާއި އަދި ގްރޫޕްތައް ވެސް މި ދުވަސްކޮޅު އަންނަނީ ހުއްޓުވަމުންނެވެ.

އެގޮތުން އިއްޔެ ކުރީގެ މަޝްހޫރު ލަވަކިޔުންތެރިޔާ އަދި ފަހުންް ދީނީ ކަންކަމަށް މީހުން ހޭލުންތެރިކުރުވަން އުޅޭ ސަލަފް ޖަމިއްޔާގެ އިސް މެމްބަރު އަލީ ރަމީޒްގެ ޓުވިޓާ އެކައުންޓް ވެސް ވަނީ ސަސްޕެންޑުކޮށްފަ އެވެ.