ރައްޔިތުންގެ މަޖިލީހުގެ މައްޗަންގޮޅި ދެކުނު ދާއިރާގެ މެންބަރު އަހްމަދު ހައިތަމްގެ ދެމަފިރިކަނބަލުންނަށް ގުރޫޕަކުން އިންޒާރުދިން މައްސަލައެއް ތަހުގީގު ކުރަން ފަށައިފި އެވެ.

ފުލުހުންގެ މީޑިއާ އޮފިޝަލް ވިދާޅުވީ މެމްބަރު ހައިތަމާއި އަނބިކަނބަލުން ޝަޖަން މުއާޒް ޝަހީމާ ބަޔަކު ދިމާކޮށްލައި އަޑުގަދަކޮށް އިންޒާރުދިން މައްސަލައެއް ފުލުހުންނަށް ހުށަހެޅިފައިވާތީ ތަހުގީގު ކުރަމުން އަންނަ ކަމަށެވެ.

ހައިތަމާއި އަނބިކަނބަލުންނަށް ހަތަރު މީހުންގެ ގުރޫޕަކުން އިންޒާރުދިނީ މިއަދުގެ ވަގުތެއްގަ އެވެ.

އިންޒާރުދިނީ ހައިތަމްގެ ދެމަފިރިކަނބަލުން ދިރިއުޅުއްވާ އެޕާޓްމަންޓް ކައިރިންނެވެ. ބައެއް މީޑިއާތަކަށް މައުލޫމާތު ދެއްވަމުން ހައިތަމް ވިދާޅުވީ އޭގެތެރެއިން ދެ މީހަކު އެޕާޓްމަންޓް ދޮރުމައްޗާއި ހަމައަށް ފަހަތުން އައިސް އިންޒާރުދިންކަމަށެވެ.

"އަޅުގަނޑުގެ އަންހެނުން ޝަޖާންއާ ދިމާލަށް ހަޑިހުތުރު އެއްޗިހި ގޮވާފައިވޭ. އަންހެނުން މިވަގުތު އިނީ ބަލިވެ، މާބަނޑު މީހަކާ ދިމާލަށް އެއްޗެތި ގޮވައި އިންޒާރުދިނުން ބަލައެއް ނުގަނެވޭ،" ހައިތަމް ވިދާޅުވި އެވެ.

މީގެކުރިން ވެސް ބައެއް ފަރާތްތަކުން ޖެއްސުންކޮށް އިންޒާރުދިން މައްސަތަކެއް ފުލުހުންނަށް ހުށަހަޅާފައިވާނެ ކަމަށެވެ. ނަމަވެސް އެއިން މައްސަލައެއް ބަލަމުންދިޔަ ކަމެއް ފުލުހުން ހާމަކޮށްފައެއް ނުވެ އެވެ.