އާލިއާ ބަޓް އަދި ރަންބީރު ކަޕޫރު އެކުގައި ފުރަތަމަ ފަހަރަށް ފެންނަ ފިލްމް"ބްރައްމަސްޓްރާ" ގެ އެންމެ ފަހުގެ ޝޫޓިންތައް ފެށުމަށް މި ދެ ފަންނާނުން ތައްޔާރަށް ތިބިކަން މިވަނީ ހާމަކޮށްފަ އެވެ.

މި ފިލްމުގެ ޝޫޓިންތައް ކުރިޔަށް ގެންގޮސްފައިވަނީ ހަންގޭރީ ގަ އެވެ.

މީޑިއާ ރިޕޯޓްތައް ބުނާގޮތުގައި ފިލްމުގެ ކުރޫއިންނާއި ކާސްޓުން ހަންގޭރީއަށް ފުރާނީ ކޮވިޑް-19 އިން ދިފާއުވުމަށް ޖަހާ ވެކްސިން ޖެހުމަށް ފަހު އެވެ. ބައިނަލްއަގުވާމީ ދަތުރުތައް ފެށުމަށް ހުއްދަ ދޭން ފަށާނީ އަންނަ އޮގަސްޓްމަހު އެވެ. ހުއްދަ ލިބުނުހާ އަވަހަކަށް ފިލްމުގެ ޝޫޓިންތައް ކުރިޔަށް ގެންދިޔުމަށް މި ފިލްމުގެ ޓީމް ހަންގޭރީއަށް ފުރާނެ އެވެ.

މި ފިލްމުގެ ޝޫޓިންތައް މެދުކެނޑުމަކަށް ފަހު ނިމިދިޔަ ފެބްރުއަރީ މަހު ފެށި އެވެ. ނަމަވެސް ފިލްމްގެ ލީޑް ރޯލުން ފެނިގެންދާ އެކްޓަރެއް ކޮވިޑަށް ޕޮޒިޓިވްވުމާއި ގުޅިގެން އަނެއްކާ ވެސް ޝޯ މެދު ކަނޑާލަން ޖެހުނެވެ. ފަހުން އާލިއާ ބަޓް އަދި ރަންބީރު ކަޕޫރު ވެސް ވަނީ ކޮވިޑަށް ޕޮޒިޓިވްވެފަ އެވެ.

މި ފިލްމުގައި އާލިއާ ބަޓް އަދި ރަންބީރު ކަޕޫރުގެ އިތުރުން އެހެނިހެން މުހިންމު ރޯލުތަކުން ފެނިގެންދާ ތަރިންގެ ތެރޭގައި، އަމީތާބް ބައްޗަން، ޑިމްޕަލް ކަޕާޑިއާ، މޯނީ ރޯއި ހިމެނެ އެވެ. އަދި ޝާހްރުކް ޚާންގެ ވަރަށް ހާއްސަ ފެނިލުމެއް ވެސް މި ފިލްމުގައި ހިމެނޭ ކަން ވަނީ ހަމަވެފަ އެވެ.