އިންޑިއާ ހައިކޮމިޝަނަށާއި އެތަނުގައި މަސައްކަތްކުރާ އޮފިޝަލުންނަށް ގެއްލުން ދިނުމަށް އެއްވެސް ބަޔަކު ގޮވާނުލާ ކަމަށާއި ދޮގުވާހަތައް ނުފެތުރުމަށް އެދޭ ކަމަށް ރައްޔިތުން މަޖިލީހުގެ ވިލިމާލެ ދާއިރާގެ މެމްބަރު އަހުމަދު އުޝާމް ވިދާޅުވެއްޖެ އެވެ.

އުޝާމް މިހެން ވިދާޅުވީ ރާއްޖޭގައި ހުންނަ އިންޑިއާ ހައިކޮމިޝަން އާއި އެކޮމިޝަން ގައި މަސައްކަތް ކުރާ އޮފިޝަލުންނަށް ސޯޝަލް މީޑިއާގައި އިންޒާރުދޭ ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފް ވިދާޅުވާ ގުޅިގެން ކުރެއްވި ޓުވީޓެއްގައި އެވެ.

މެމްބަރު ޝަރީފްގެ ޓުވީޓަށް ރައްދު ދެއްވައި އުޝާމް ވިދާޅުވީ "އިންޑިއާ އަޓް" ކެމްޕޭނަކީ އިންޑިއާގެ ހައިކޮމިޝަނަށް އިންޒާރު ދިނު ކަމަށް ނުބެލެވޭ ކަމަށެވެ. އަދި ތިމާ ހިތް ހަމަނުޖެހޭ ކޮންމެ ވާހަކައަކީ އެބަޔަކަށް ގެއްލުން ދިނުން ނޫން ކަމަށްވެސް އޭނާ ވިދާޅުވި އެވެ.

އެފަދަ ދޮގު ވާހަކަތައް ނުފެތުރުމަށް ޝަރީފަށް އުޝާމް ގޮވާލެއްވި އެވެ.

މަރަދޫ ދާއިރާގެ މެމްބަރު ޝަރީފް އިއްޔެ ކުރެއްވި ޓްވީޓްގައި ބުނެފައިވަނީ ސޯޝަލް މީޑިއާގައި އިންޑިއާ ހައިކޮމިޝަނަށް އަމާޒުކޮށް ދެމުންދާ ނުރައްކާތެރި އިންޒާރުތައް، މަޖިލީހުގެ ޚާރިޖީ ގުުޅުންތަކާބެހޭ ކޮމިޓީގެ މުޤައްރިރުގެ ހައިސިއްޔަތުން ކުއްވެރިކުރައްވާ ކަމަށެވެ. އަދި އެމައްސަލަ ފުލުހުން މިހާރު ތަހުޤީޤްކުރަމުންދާ ކަމަށްވެސް ޝަރީފް ވިދާޅުވި އެވެ.

މިކަމާ ގުޅިގެން ފޮރިން މިނިސްޓްރީން ރޭ ނެރުނު ނޫސްބަޔާނެއްގައި ބުނެފައިވަނީ ރާއްޖޭގައި ހުރި ޗައިނާ އެމްބަސީ ކުރިމަތީގައި މުޒާހަރާކުރާނެ ކަމަށާއި އިންޑިއާގެ ހައިކޮމިޝަން ގޮއްވާލާނެކަމުގެ އިންޒާރު ސޯޝަލް މީޑިއާގައި ދައުރުވެފައިވާތީ އެ ދެ އިމާރާތުގެ ސަލާމަތާއި ރައްކާތެރިކަން ކަށަވަރު ކުރުމަށް އެ ދެ މިޝަނުން އެ މިނިސްޓްރީގައި އެދިފައިވާ ކަމަށެވެ.

އެކަމާ ގުޅިގެން އެ ދެ އިމާރާތުގެ ސެކިއުރިޓީ ވަރުގަދަކޮށްފައިވާ ކަމަށް ވެސް ފޮރިން މިނިސްޓްރީން ބުންޏެވެ.

ދޭދޭ ގައުމުތަކާ އެކު އޮންނަ ގުޅުންތަކާ ބެހޭގޮތުން ހަގީގަތެއް ނެތް ވާހަކަތަކާއި، ރާއްޖޭގައި ހުންނަ ބޭރު ގައުމުތަކުގެ ޑިޕްލޮމަޓިކް މިޝަންތަކާއި އެ މިޝަންތަކުގައި މަސައްކަތްކުރާ ޑިޕްލޮމަޓުންގެ ސަލާމަތާއި ރައްކާތެރިކަމަށް ބުރޫއަރާފަދަ ހަބަރުތައް ފެތުރުމަކީ އެ ގައުމުތަކާއެކު އޮންނަ ޒަމާންވީ ގުޅުމަށް ބުރޫއަރައި، އެ ގައުމުތަކާ މެދު ދިވެހިންގެ ހިތްތަކުގައި ނަފްރަތު އުފެދުމަށް މަގުފަހިވެ، ދިވެހި ރައްޔިތުންނަށްވެސް އޭގެ ނޭދެވޭ އަސަރުތައް ކުރުން އެކަށީގެންވާ ކަމެއް ކަމަށް ފޮރިން މިނިސްޓްރީން ބުންޏެވެ.