ބަންސާލީގެ ފުރަތަމަ އަލްބަމް "ސުކޫން" އަށް ބޮޑު ތަރުހީބެއް

ބޮލީވުޑްގެ ކުޅަދާނަ ޑައިރެކްޓަރު ސަންޖޭ ލީލާ ބަންސާލީގެ ފުރަތަމަ މިއުޒިކް އަލްބަމް "ސުކޫން" ރިލީޒްކޮށްފި އެވެ.

މިދިޔަ އަހަރު އިއުލާނު ކުރި ބަންސާލީގެ ފުރަތަމަ މިއުޒިކް އަލްބަމް "ސްކޫން" ރިލީޒްކޮށްފައި ވަނީ މިމަހުގެ ހަތް ވަނަ ދުވަހު އެވެ.

މި އަލްބަމްގައި 9 ލަވަ ހިމެނޭއިރު، މި ލަވަތައް ކިޔާފައި ވަނީ އިންޑިއާގެ މަޝްހޫރު ލަވަކިޔުންތެރިންނެވެ. އޭގެ ތެރޭގައި ޝްރެޔާ ގޯޝާލް، ރާޝިދު ޚަން، އަރުމާން މާލިކް އަދި ސާހިލް ހާޑީ ހިމެނެ އެވެ.

މި އަލްބަމްގައި ހިމެނޭ ލަވަތަކަށް އަންނަނީ ބޮޑު ތަރުހީބެއް މިހާރު ވެސް ލިބެމުންނެވެ.

"ސުކޫން" ގެ ޓްރެކް ލިސްޓު ވެސް މިހާރު ވަނީ އާންމުކޮށްފަ އެވެ. އެ ޓްރެކް ލިސްޓްގައި ހިމެނޭ ލަވަތަކަކީ "ގާލިބް ހޯނާ ހޭ"، "ތުޖޭ ބީ ޗާންދު"، "ދަރުދު ޕައްތަރޯން ކޯ"، "ގަރާރު"، "ގަމް ނާ ހޯނޭ"، "ސިވާ ތޭރޭ"، "ހަރް އޭކް ބާތު" އަދި "މުސްކްރާހަޓް" އެވެ.

"ހަމް ދިލް ދޭ ޗުކޭ ސަނަމް" އާއި "ދޭވްދާސް" ފަދަ ރީތި ފިލްމުތައް ގެނެސްދިން ބަންސާލީ އެންމެ ފަހުން ޑައިރެކްޓްކުރި ފަސް ފިލްމުގެ މިއުޒިކް ވެސް އޭނާ ހެދީ އަމިއްލައަށެވެ. އެއީ މި އަހަރުގެ "ގަންގޫބާއީ ކަތިއަވާޅީ" އާއި 2018 ގެ "ޕަދުމާވަތު" އާއި 2015 ގެ "ބަޖިރާއޯ މަސްތާނީ" އާއި 2013 ގެ "ރާމް ލީލާ" ގެ އިތުރުން 2010 ގެ "ގުޒާރިޝް" އެވެ.

މި ހުރިހާ ފިލްމުތަކަށް ބަންސާލީ ހެދި ހުރިހާ ލަވައަށް ވަރަށް ބޮޑު ތަރުހީބެއް ލިބިގެން ދިޔަ އެވެ. ބަންސާލީގހެ ފިލްމުތަކަކީ ގިނަ ބައެއްގެ އިންތިޒާރުކުރަމުން އަންނަ އަދި ބޮލީވުޑްގައި ބްލޮކްބަސްޓާ ފިލްމުތަކެވެ.