ވަރަށް މަދުން ނޫނީ ނުފެންނަ ނިއުރޯލޮޖިކަލް ޑިސްއޯޑަރެއް ކަމަށްވާ ސްޓިފް ޕާސަން ސިންޑްރޯމް (އެސްޕީއެސް) ޖެހިފައިވާ ކަމަށް މަޝްހޫރު ލަވަކިޔުންތެރިޔާ ސެލިން ޑިއޯން ހާމަކޮށްފި އެވެ.

އުމުރުން 54 އަހަރުގެ ސެލިން މިބައްޔާ ހަނގުރާމަ ކުރަމުން އަންނަކަން ހާމަކޮށްފައި ވަނީ އޭނާގެ އިންސްޓަގްރާމްގައި ކޮށްފައިވާ ޕޯސްޓެއްގައި އެވެ.

ފްރާންސާއި ކެނެޑާއަށް ނިސްބަތްވާ ލަވަކިޔުންތެރިޔާ ސެލިން ބުނީ އެ ބަލީގެ ސަބަބުން މޫނަށް އަސަރުކޮށް، ހިނގުމާއި، ލަވަކިޔުމަށް ވެސް އުނދަގޫވާ ކަމަށެވެ. އެހެންކަމުން އަންނަ އަހަރު އިނގިރޭސިވިލާތާއި ޔޫރަޕްގައި ބާއްވަން ރޭވިފައިވާ ޝޯތައް ކުރިއަށް ނުގެންދެވޭނެ ކަމަށް ސެލިން ބުންޏެވެ.

"އަދި މި ގޮންޖެހުންތަކާއި ކުރިމަތިލާން ޖެހުމުގެ އިތުރުން، ދިމާވެފައިވާ ހުރިހާ ކަމެއްގެ ވާހަކަ ދެއްކުމަކީ ހަގީގަތުގައި ވެސް ވަރަށް އުނދަގޫ ކަމެއް،" 5.2 މިލިއަން ފޮލޯވަރުން ތިބޭ އޭނާގެ އިންސްޓަގްރާމްގައި ކޮށްފައިވާ ޕޯސްޓްގައި ބުނެފައިވެ އެވެ.

ސެލިން ޑިއޯން އިންސްޓަގްރާމްގައި ކޮށްފައިވާ ޕޯސްޓް

އެސްޕީއެސްއަކީ ކޮންމެ މިލިއަން މީހެއްގެ ތެރެއިން އެކަކަށް ކުރިމަތިވާ މައްސަލައެކެވެ. އެ ކޮންޑިޝަންއާ ގުޅޭ މާ ބޮޑު އެއްޗެއް ސައިންސްވެރިންނަށް ހޯދިފައެއް ނުވެ އެވެ.

ނޭޝަނަލް އިންސްޓިޓިއުޓް ފޯ ނިޔުރޮލޮޖިކަލް ޑިސްއޯޑާޒްއިން ބުނީ އެއީ ލޯ ތޮޅޭ ގޮތަށް މޫނުގެ މަސްތައް މާބޮޑަށް ތޮޅެން ދިމާވާ ހާލަތެއް ކަމަށެވެ. އެކަން ބޮޑަށް ދިމާ ވަނީ އަލިގަދަވެ، ކުއްލިއަކަށް އަޑެއް އިވުން ކަހަލަ ކަންކަން ވުމުންނެވެ.

އެކަމަށް ވަކި ފަރުވާއެއް ނެތް އިރު، އަލާމާތްތައް ކުޑަކުރަން އެންޒައިޓީއާ ދުރުކުރާ ބޭހާއި މަސްތައް ރިލެކްސްކުރުވާ ބޭސްތައް ދެ އެވެ.

ޓައިޓޭނިކް ލަވަ "މައި ހާޓް ވިލް ގޯ އޮން" އަށް 2014 ވަނަ އަހަރު އެންމެ މޮޅު ލަވައިގެ އޮސްކާ ލިބުނު ސެލީން ވަނީ އޭނާގެ ފިރިމީހާ ރެނޭ އެންގެލިލް ކެންސަރާ ހަނގުރާމަ ކުރަން ފެށި ފަހުން ދާއިރާއިން ބްރޭކެއް ނަގައިފަ އެވެ. އަދި އޭގެ އަހަރު ފަހުން އޭނާގެ ހުށަހެޅުންތައް އަލުން ފެށި ނަމަވެސް 2016 ވަނަ އަހަރުގެ ކުރީކޮޅު އަނެއްކާވެސް ސްޓޭޖުން ދުރަށް ދިޔައީ އެންގެލިލް އާއި އޭނާގެ ކޮއްކޮ ޑެނިއަލް ޑިއޯންގެ މަރާއި ގުޅިގެންނެވެ.