މަޝްހޫރު ލަވަކިޔުންތެރިޔާ އެލްވިސް ޕްރިސްލީގެ އަންހެން ދަރި ލީސާ މާރީ ޕްރިސްލީ އުމުރުން 54 އަހަރުގައި ރޭ މަރުވެއްޖެ އެވެ.

އެމެރިކާގެ މީޑިއާތަކުން އިއްޔެ ބުނި ގޮތުގައި ލަވަލިޔުންތެރިޔާ ލީސާ ވަނީ ވަރަށް ކުއްލި ގޮތަށް އިއްޔެ ހޮސްޕިޓަލަށް ގެންގޮސްފަ އެވެ. ލީސާ މަރުވީ އާޓް އެޓޭކެއް ޖެހިގެންނެވެ.

ބައެއް މީޑިއާތަކުން ބުނި ގޮތުގައި ބުރާސްފަތި ދުވަހު ހެނދުނު އެނދުގައި އޮތް އިރު ވެސް ލީސާގެ އެއްވެސް ހަރަކާތެއް ނެތެވެ. ލީސާއާ އެކު އެއް ގެއެއްގައި އުޅޭ ކުރީގެ ފިރިމީހާ ޑެނީ ވަނީ ލީސާ އަށް ސީޕީއާރު ދީފައި ކަމަށް ވެސް ޚަބަރުތަކުން ބުނެ އެވެ.

ލީސާ އެންމެ ފަހުން ޕަބްލިކް އިވެންޓަކުން ފެނިފައި ވަނީ އަންގާރަ ދުވަހުގެ ރޭ ބެވަލީ ހިލްސްގައި ބޭއްވި ގޯލްޑަން ގްލޯބް އެވޯޑުގެ ތެރޭންނެވެ. އެ ހަފުލާގައި އެންމެ މޮޅު ބަތަލްގެ އެވޯޑް އޮސްޓިން ބަޓްލާ އަށް ލިބުމާ އެކު ލީސާ އާއި އޭނާގެ މަންމަގެ ލޮލުން ކަރުނަ ފޭބިތަން ފެނިފައިވެ އެވެ. ބަޓްލާ އަށް އެންމެ މޮޅު ބަތަލުގެ އެވޯޑް ލިބުނީ ލީސާގެ ބައްޕަގެ ރޯލު އަދާކުރި ފިލްމުންނެވެ. ހަފުލާގައި ވާހަކަ ދައްކަމުން ބަޓްލާ ވަނީ ފިލްމަށް އެލްވިސްގެ އާއިލާ އިން ލިބުނު އެހީތެރިކަމަށް ޝުކުރު އަދާކޮށްފަ އެވެ.

ނަވާރަ ސަތޭކަ ފަސްދޮޅަސް އަށް ވަނަ އަހަރު އުފައްވި ލީސާ ވަނީ އޭނާގެ ބައްޕަގެ ފިޔަވަޅުތަކުން ހިންގާ ތިން އަލްބަމެއް ނެރެފަ އެވެ. އޭނާ 2003 ވަނަ އަހަރު ނެރުނު ފުރަތަމަ އަލްބަމަށް ވެސް ބޮޑު ތަރުހީބެއް ލިބިފަ އެވެ.

ލީސާ ވަނީ ލަވަކިޔުންތެރިޔާ މައިކަލް ޗެކްސަން އާއި ބަތަލް ނިކޮލަސް ކޭޖްއާ ކައިވެނިކޮށްފަ އެވެ. ލީސާ އަށް ވަނީ ހަތަރު ކުދިން ލިބިފަ އެވެ.

ލީސާގެ ފިރިހެން ދަރިފުޅު ބެންޖަމިން 2020 ވަނަ އަހަރު ވަނީ އުމުރުން 27 އަހަރުގައި މަރުވެފަ އެވެ.

ލީސާގެ ބައްޕަ އެލްވިސް 1977 ވަނަ އަހަރު މަރުވީ އުމުރުން 42 އަހަރުގައި ހާޓް އެޓޭކެއް ޖެހިގެންނެވެ. އޭރު ލީސާގެ އުމުރަކީ 9 އަހަރެވެ.