އިންޑިއާ ސަރުކާރުން ދޭ އެންމެ މަތީ އެވޯޑްގެ ތެރޭގައި ހިމެނޭ ޕަދްމާޝްރީ އެވޯޑް ބަތަލާ ރަވީނާ ޓަންޑަން ލިބުމާ ގުޅިގެން ކިޔާ ފާޑުކިޔުންތަކަށް އޭނާ ރައްދުދީފި އެވެ.

އިންޑިއާ ސަރުކާރުން ހަތަރުވަނައަށް ދޭ އެންމެ ޝަރަފުވެރި އެވޯޑު ކަމަށްވާ، "ޕަދްމާޝްރީ އެވޯޑް" ބަތަލާ ރަވީނާ އަށް އިންޑިއާގެ ރައީސް ޑްރޫޕަދީ މުރުމު ވަނީ އަރުވައިފަ އެވެ. މި ކާމިޔާބީއަށް ރަވީނާގެ އާއިލާ އާއި ރައްޓެހިނާއި ފިލްމީ ދާއިރާގައި މަސައްކަތް ކުރާ ފަރާތްތަކުން ވަނީ މަރުހަބާ ކިޔައިފަ އެވެ. އެހެން ނަމަވެސް ސޯޝަލް މީޑިއާގައި މި އެވޯޑާއި ގުޅިގެން ރަވީނާއަށް ބައެއް ފަރާތްތަކުން ވަނީ ފާޑުކިޔުން އަމާޒުވެފަ އެވެ.

މި ފާޑުކިޔުންތަކާއި ގުޅިގެން މީޑިއާގައި ރަވީނާ ބުނެފައިވަނީ ފާޑުކިޔާ ފަރާތްތަކާ މެދުގައި ނުވިސްނާ ކަމަށާއި އެމީހުން ފާޑުކިޔަނީ އަމިއްލަ އެޖެންޑާއެއް އޮތުމުން ކަމަށެވެ. އަދި އެފާޑުކިޔުންތަކުގެ ސަބަބުން އޭނާގެ މަގުބޫލުކަމެއް ކުޑައެއް ނުވާނެ ކަމަށްވެސް ރަވީނާ ބުންޏެވެ.

އެ މީހުންނަށް ނުފެނޭ އަހަރެމެން ކުރާ ބުރަ މަސައްކަތާއި ހޭދަކުރާ ވަގުތެއް،" ރަވީނާ ބުންޏެވެ.

ފާޑުކިޔާ ފަރާތްތަކުން ބުނަމުންދަނީ އެއެވޯޑަކީ ރަވީނާއަށް ހައްގު އެވޯޑެއް ނޫން ކަމަށެވެ. އަދި ރަވީނާއަށް އެވޯޑް ލިބެންވީ ސަބަބެއް ނޭނގޭ ކަމަށް ވެސް ބައެއް ފަރާތްތަކުން އަންނަނީ ބުނަމުންނެވެ.

އިންޑިއާ ސަރުކާރުން ދޭ އެންމެ މަތީ އެވޯޑްގެ ތެރޭގައި ހިމެނޭ ޕަދްމާގެ ތިން ދަރަޖައެއް ހިމެނެ އެވެ. އެއީ ޕަދުމާވި ބުޝަން، ޕަދުމާ ބުޝަން އަދި ޕަދުމާ ޝްރީ އެވެ.

ނުވަދިހައިގެ އަހަރުތަކުގައި ބޮލީވުޑްގައި އެންމެ މަޝްހޫރުވެގެން ދިޔަ އެއް ބަތަލާ ރަވީނާ އެންމެ އަވަހަށް ފެނިގެންދާނީ ރޮމޭންޓިކް- ކޮމެޑީ ފިލްމު "ގުދުޗާޑީ" އެވެ.