އޮސްކާ އެވޯޑް ހާސިލުކޮށްފައިވާ އިންޑިއާގެ މަޝްހޫރު މިއުޒިޝަން އޭއާރް ރަހުމާން ޕޫނޭގައި ކުރިއަށް ގެންދިޔަ ޝޯއެއްގައި ލަވަކިޔަމުންދަނިކޮށް ފުލުހުން ގޮސް ހުއްޓުވައިފި އެވެ.

ލަވަކިޔުންތެރިޔާ އާރް ރަހުމާން އާދީއްތަ ދުވަހު ޕޫނޭގައި ލައިވްކޮށް ޕާފޯމް ކުރިއިރު، އެތަނަށް ފުލުހުން ގޮސް އެޝޯ ވަނީ ހުއްޓާލުމަށް އަންގާފަ އެވެ. ފުލުހުން ސްޓޭޖަށް އަރައި ޝޯ ހުއްޓުވުމަށް މަސައްކަތްކުރާ ވީޑިއޯއެއް ސޯޝަލް މީޑިއާގައި ވަނީ ވައިރަލްވެފަ އެވެ.

ފުލުހުން މި ޝޯ އެވަގުތު ހުއްޓާލަން އަންގާފައި ވަނީ ޝޯ ކުރިއަށް ގެންދިޔުމަށް ދީފައިވާ ވަގުތު ހަމަވުމާ ގުޅިގެންނެވެ. މިޝޯ ކުރިއަށް ގެންދިޔުމަށް ހުއްދަ ދީފައިވަނީ ރޭގަނޑު 10 ޖެހުމާ ހަމައަށެވެ.

ރިޕޯޓްތައް ބުނާ ގޮތުގައި އާރް ރަހްމާން ހުއްޓުވީ އޭނާގެ ހިޓް ޓްރެކް ޗައިއްޔާ ޗައިއްޔާ ޕާފޯމްކުރަމުން ދަނިކޮށެވެ.

ނޫސް އެޖެންސީ އޭއެންއައި އިން ކުރި ޓްވީޓެއްގައި ބުނެފައި ވަނީ "ރޭގަނޑު 10 ޖަހާއިރު ހުއްދަ ގަޑިއަށް ވުރެ އިތުރަށް ޕާފޯމް ކުރަމުން ގެންދިއުމުން އޭއާރް ރަހުމާންގެ ކޮންސެޓްގައި ލަވަކިޔުން ފުލުހުން ހުއްޓުވި" ކަމަށެވެ.

މި ޝޯއާ ގުޅިގެން އުމުރުން 54 އަހަރުގެ ރަހްމާން ކުރި ޓްވީޓެއްގައި ވަނީ ދިން ސަޕޯޓަށް ޝުކުރުއަދާ ކޮށްފަ އެވެ. އެހެން ނަމަވެސް ދިމާވި ހާދިސާއާ ގުޅޭގޮތުން އޭނާ އެއްޗެއް ބުނެފައެއް ނުވެ އެވެ.