ގިނަ ބަޔަކު އިންތިޒާރު ކުރަމުން އަންނަ " ރޮކީ އޯރް ރާނީ ކީ ޕްރޭމް ކަހާނީ"ގެ ހާއްސަ ސްކްރީނިން އެއް ބޮލީވުޑްގެ ތަރިންނަށްޓަކައި ބާއްވައިފި އެވެ.

ރަންވީރް ސިންހްއާއި އާލިއާ ބަޓް ލީޑު ރޯލުން ފެނިގެންދާ މި ފިލްމުގެ ސްޓާ ސްކްރީނިންގައި ބޮލީވުޑްގެ މަޝްހޫރު ގިނަ ތަރިން ތަކެއް ފެނިގެން ގޮސްފައިވެ އެވެ.

އެގޮތުން މި ސްކްރީނިންގައި ފެނުނު ތަރިންގެ ތެރޭގައި ރަންބީރު ކަޕޫރާއި އާލިއާ ބަޓްގެ އިތުރުން ކެޓްރީނާ ކައިފްއާއި ވިކީ ކައުޝަލް ވެސް ހިމެނެ އެވެ.

ސްކްރީނިންއަށް ފަހު ނޫސްވެރިން ކުރި ސުވާލަކަށް ޖަވާބު ދެމުން ވިކީއާއި ކެޓްރީނާ ވެސް ބުނީ ކަރަން ޖޯހަރް ޑައިރެކްޓްކުރާ އެ ފިލްމު ވަރަށް ރީތި ކަމަށެވެ.

"ރޮކީ އޯރް ރާނީ ކީ ޕްރޭމް ކަހާނީ"ގެ އެންމެ ފާހަގަ ކޮށްލެވޭ އެއް ކަމަކީ ފިލްމުގެ ލީޑު ދެތަރިންނަކީ ކުރިން ބޮލީވުޑްގައި މަޝްހޫރު އެއް ޖޯޑުގެ މިހާރުގެ ބައިވެރިން ކަމެވެ.

އެގޮތުން ރަންވީރުގެ އަންހެނުން ދީޕިކާއާއި އާލިއާގެ ފިރިމީހާ ރަންބީރުގެ ލޯބީގެ ވާހަކައަކީ އެއްދުވަސްވަރެއްގައި ބޮލީވުޑްގައި އެންމެ ގަދައަށް ދެކެވުނު އެއް ވާހަކަ އެވެ.

"ރޮކީ އޯރް ރާނީ ކީ ޕްރޭމް ކަހާނީ"ގެ ސްޓާ ސްކްރީނިން ބާއްވާފައިވާއިރު އެ ފިލްމު އާއްމުކޮށް ސްކްރީންތަކުގައި އަޅުވަން ހަަމަޖެހިފައިވަނީ ޖުލައި މަހުގެ 28 ވަނަ ދުވަހު އެވެ.