ބޮލީވުޑްގެ ތަރި އާލިއާ ބަޓްއާ ސިފަ އެއްގޮތް ވުމަކީ އޭނާގެ ކުށެއް ނޫން ކަމަށް އިންޑިއާގެ ޓީވީ އިންޑަސްޓްރީއިން މަޝްހޫރުވި ސެލެސްޓީ ބައިރާގީ ބުނެފި އެވެ.

ޓީވީ ޝޯ "ރައްޖޯ"ގެ ލީޑު ރޯލުން ފެންނަ ސެލެސްޓީ މިހެން ބުނެފައިވަނީ އޭނާ އާލިއާއާ ވައްތަރުވާން މަސައްކަތް ކުރަނީ ގަސްދުގައި ކަމަށް ބުނެ ގިނަ ބަޔަކު ފާޑު ކިޔަމުން އަންނަ ދަނޑިވަޅެއްގަ އެވެ.

މީގެ ކުރިން ވެސް އާލިއާއާއި ސެލެސްޓީގެ އެއްވައްތަރު ކަމުގެ ވާހަކަތައް މީޑިއާއަށް ތިލަވެފައިވާއިރު އެ ހަބަރުތަކަށް ސެލެސްޓީ މާ ބޮޑު ސަމާލުކަމެއް ދީފައެއް ނުވެ އެވެ.

އޭނާ ވަނީ އެކި ފަހަރު މަތިން އެ ހަބަރުތައް ޝެއާކޮށް އާލިއާއާ ވައްތަރުހެން ހީވާ އޭނާގެ ބައެއް ފޮޓޯތައް ވެސް އެކަމުގެ ތެރެއިން ހިއްސާކޮށްފަ އެވެ.

އެހެން ނަމަވެސް ސެލެސްޓީ މިކަމާ ގުޅޭގޮތުން ވާހަކަ ދައްކާފައި މިވަނީ އެކަން އޭނާ ކުރަނީ ގަސްދުގައި ކަމަށް ބައެއް މީހުން ބުނަން ފެށުމުން އޭނާގެ އަމިއްލަ ދިފާއުގަ އެވެ.

އާލިއާއާއި ސެލެސްޓީގެ ސިފަތައް ވައްތަރު ކަމާއި އެ ދެތަރިންގެ ހިނިތުންވުން ވެސް ވަރަށް އެއްގޮތް ކަމަށް ގިނަ ބަޔަކު ބުނެފައިވެ އެވެ.