އާޝާ ބޯސްލޭއަކީ 1940ގެ އަހަރުތަކުން ފެށިގެން ބޮލީވުޑްގައި އެންމެ ނަގާކިޔާ އެއް އަންހެން އަޑުގެ ވެރިޔާ އެވެ. އޭނާގެ އަޑުން އެތައް ހާސް ލަވައެއް ކިޔައިދީފައިވާއިރު އެ ލަވަތަކަކީ އާއްމުންގެ މެދުގައި ވެސް ބޮޑު މަގުބޫލުކަމެއް ހޯދާފައިވާ ލަވަތަކެކެވެ.

އަންނަ ސެޕްޓެމްބަރު މަހުގެ އަށްވަނަ ދުވަހު އާޝާއަށް 90 އަހަރު ފުރޭއިރު އެ މުނާސަބަތާ ގުޅުވައިގެން ދުބާއީގައި ބްރޯޑްވޭ ސްޓައިލްގެ ޝޯއެއް ދޭން އޭނާ ވަނީ ނިންމާފަ އެވެ.

"އާޝާ އެޓް 90"ގެ ނަމުގައި ބާއްވާ އެ ޝޯގައި ބައިވެރިވާ 55 ފަންނާނުންގެ ތެރެއިން 23 ފަންނާނުންނަކީ ނެށުންތެރިން ކަމަށާއި ޝޯގެ ތެރެއިން އާޝާގެ ދިގު ކެރިއަރުގެ ހަނދާންތައް އާވާނެ ކަމަށް އޭޭނާ ބުނެ އެވެ.

އާޝާ އިތުރަށް ބުނީ ދުބާއީއިން ލިބޭ ތަރުުހީބު ރަނގަޅުވެއްޖެނަމަ އަވަސް މުސްތަގްބަލެއްގައި އެމެރިކާ އަދި އިނގިރޭސި ވިލާތުގައި ވެސް ޝޯތަކެއް ބާއްވާނެ ކަމަށެވެ.

1943 ވަނަ އަހަރު އުމުރުން އެންމެ 10 އަހަރުގައި ބޮލީވުޑްގެ ފިލްމުތަކަށް ލަވަކިޔައިދޭން ފެށި އާޝާ ބޮލީވުޑްގައި މަސައްކަތް ކުރަމުން އަންނަތާ މިހާރު 80 އަހަރުވީ އެވެ.

އާޝާ ބޯސްލޭގެ އިތުރުން އޭނާގެ ދައްތަ ލަތާ މަންގޭޝްކަރްއަކީ ވެސް ހަމަ އެހާ މަޝްހޫރު ލަވަކިޔުންތެރި އެކެވެ. ދާދި ފަހުން ލަތާ މަރުވި ނަމަވެސް އޭނާގެ ލަވަތައް އަދިވެސް މީހުން އަޑުއަހަ އެވެ.