ސޯޝަލް މީޑިއާގައި އަމީތާބް ބައްޗަންގެ އަމަލުތައް ހުންނަ ގޮތުން ބައެއް ފަހަރު ލަދުގަންނަ ކަމަށް އޭނާގެ ދަރިފުޅު އަބީޝޭކް ބައްޗަން ބުނެފި އެވެ.

އަބީޝޭކް ބުނެފައިވަނީ އޭނާގެ ފިލްމެއް އަޅުވަން ކައިރިވެއްޖެނަމަ ބައްޕަ އަމީތާބްގެ ސޯޝަލް މީޑިއާ ފީޑުތަކުން ފެންނާނީ އޭނާއަށް ތައުރީފްކޮށް މީހުން ކޮށްފައި ހުންނަ ޓްވީޓްތަކުގެ ރީޓްވީޓްތައް ކަމަށެވެ.

"ބައްޕަ އެކަން ކުރަނީ އަހަންނަށް ރަނގަޅަށް އަހަރެންގެ މަސައްކަތް ޕްރޮމޯޓް ކުރަން ކަން ވެސް އެނގޭ. އެކަމަކު ބައެއް ފަހަރު އެއީ ވަރަށް ލަދުވެތި ވެސް ކަމެއް" އަބީޝޭކް ބުންޏެވެ.

އަބީޝޭކްގެ ފިލްމީ މަސައްކަތްތަކުގައި އޭނާއަށް ހިތްވަރުދޭން ފަހަތުގައި އަބަދުވެސް ދެގޮތެއް ނުވެ ހުރި އެކަކަކީ އޭނާގެ ބައްޕަ އަމީތާބެވެ.

އަބީ ޝޭކް އިތުރަށް ބުނެފައިވަނީ މިއަދު އޭނާއަކީ ވެސް ބައްޕައެއް ކަމަށާއި އެހެން ކަމުން އަމީތާބް އެގޮތަށް ކަންތައް ކުރާ ސަބަބު ވަރަށް ރަނގަޅަށް އެނގޭ ކަމަށެވެ.