ގިނަ ބައެއްގެ މަގުބޫލުކަމާއި ތައުރީފް ހޯދަމުން އަންނަ "ގަދަރް 2" އަށް ލިބިފައިވާ ކާމިޔާބީ ފާހަގަ ކުރުމުގެ ގޮތުން އެ ފިލްމުގެ ޕްރޮޑިއުސަރުން ކުލަގަދަ ޕާޓީއެއް ބާއްވައިފި އެވެ.

މުމްބާއީގައި ބޭއްވި އެ ޕާޓީގައި ފިލްމުގެ ތަރިންގެ އިތުރުން ބޮލީވުޑްގެ މަގުބޫލު ގިނަ ފަންނާނުން ތަކެއް ފެނިފައިވެ އެވެ. އޭގެ ތެރޭގައި ޝާހްރުކް ޚާން، ސަލްމާން ޚާން އަދި އާމިރް ޚާން ވެސް ހިމެނެ އެވެ.

މި ޕާޓީގެ ތެރެއިން އެންމެ ފާހަގަވި އެއް ކަމަކީ މީގެ ކުރިން މައްސަލަތަކެއް ޖެހި އެކަކު އަނެކަކާ ވާހަކަ ނުދައްކާތާ ގިނަ ދުވަސްތަކެއް ވެފައިވާ ގަދަރުގެ ލީޑް ތަރި ސަނީ ޑިއޯލްއާއި ޝާހްރުކް ޚާން އެކުގައި ފެނިގެން ދިވުމެވެ.

މިދިޔަ އޮގަސްޓް މަހުގެ 11 ވަނަ ދުވަހު ސިނަމާތަކަށް ނުކުތް ގަދަރް 2 އަށް 500 ކްރޯޑްގެ އާމްދަނީއެއް ލިބެން ކައިރިވެފައި ވާއިރު ފިލްމް ކްރިޓިކްސްގެ ތައުރީފް ވެސް އެ ފިލްމަށް އަންނަނީ ލިބެމުންނެވެ.

"ގަދަރް 2"އަކީ 2001 ވަނަ އަހަރު ނުކުތް ފިލްމް "ގަދަރް: އެކް ޕްރޭމް ކަތާ"ގެ ސީކުއަލް އެކެވެ. މިފިލްމުގައި ވެސް ފެނިގެންދަނީ ކުރީގެ ފިލްމުން ފެނިގެންދިޔަ ސަނީ ޑިއޯލްއާއި އަމީޝާ ޕަޓޭލްގެ އިތުރު އުތުކަރްޝް ޝަރްމާ އެވެ.