2013 ވަނަ އަހަރު ދަން ޖެހިފައި ހުއްޓާ ފެނުނު ބޮލީވުޑްގެ އެކްޓްރެސް ޖިއާ ޚާންގެ މަރުގެ މައްސަލާގައި ތުހުމަތު ކުރެވުނު އޭރު އޭނާގެ ލޯބިވެރިޔާ ކަމަށް ބުނެވޭ ސޫރަޖް އޭނާގެ އިހުސާސްތައް ބަންޑުން ކޮށްލައިފި އެވެ.

އިންޑިއާގެ ނޫހަކަށް މި ފަހުން ދިން އިންޓަވިއުއެއްގައި ސޫރަޖް ވަނީ އޭނާގެ ފިލްމީ މަސައްކަތްތަކާއި ޒާތީ ދިރިއުޅުމާ ބެހޭ ގޮތުން ވާހަކަ ދައްކާފަ އެވެ.

ދިހަ އަހަރަށް ދެމިގެންދިޔަ ޖިއާގެ މަރުގެ މައްސަލައާ ބެހޭ ގޮތުން ސޫރަޖް ބުނީ އެ ދުވަސްވަރު އޭނާއަށް ކުރިމަތިވި ކަންތައް އެނގޭނީ ހަމައެކަނި އޭނާއަށް ކަމަށާއި ކޮންމެ ދުވަހަކު ވެސް އާ ގޮންޖެހުންތަކަކާ ކުރިމަތިލާން ޖެހުނު ކަމަށެވެ.

އޭގެ އިތުރުން އެ މައްސަލައާ ހެދި ދަތުރުފަތުރަށް ހުރަސްއެޅި އޭނާއަށް ބޮލީވުޑްގެ މަސައްކަތްތައް ވެސް ގެއްލުނު ކަމަށާއި ޕްރޮޑިއުސަރުން އޭނާއާއެކު މަސައްކަތް ކުރަން ބޭނުންނުވާ ކަމަށް ވެސް ސޫރަޖް ބުންޏެވެ.

"އަހަރެން ނަމަވެސް ކޯޓުގައި މަރުގެ ތުހުމަތު ކުރެވިފައިވާ މީހަކާއެކު މަސައްކަތެއް ނުކުރާނަން" އޭނާ ބުންޏެވެ.

ދިގުލައިގެން ދިޔަ ޝަރީއަތްތަކަށްފަހު ސޫރަޖްއަށް ކުރެވިފައިވާ ތުހުމަތުތައް އޭނާގެ މައްޗަށް ސާބިތުނުވާ ކަމަށް ކޯޓުން ނިންމީ މިއަހަރުގެ ކުރީކޮޅު އެވެ.

ސޫރަޖް އިތުރަށް ބުނީ މީހަކާ ރައްޓެހިވެގެން އުޅޭތާ ހަތް އަހަރު ވެއްޖެ ކަމަށާއި ވަރަށް އަވަހަށް ކައިވެނި ކުރުމުގެ ފުރުސަތު އެބައޮތް ކަމަށެވެ.

ޖިއާ ޚާން ދަން ޖެހިފައި ހުއްޓާ ފެނުނީ 2013 ވަނަ އަހަރުގެ ޖޫން މަހުގެ ތިންވަނަ ދުވަހު މުމްބާއީގެ ޖުހޫގައި އޭނާ ދިރިއުޅުނު ގެއިންނެވެ.