ރާނީ މުކަރްޖީއަކީ ހަމަ ގައިމުވެސް ބޮލީވުޑްގައި މިހާރު ހަރަކާތްތެރިވާ އެންމެ ތަޖުރިބާކާރު އެއް ފަންނާނަށް ވާނެ އެވެ. ބޮލީވުޑްގައި އޭޭނާ މަސައްކަތް ކުރާތާ 27 އަހަރު ވެފައިވާއިރު ރާނީގެ މަގުބޫލުކަމަށް ކުޑަވެސް ބަދަލެއް އައިސްފައެއް ނުވެ އެވެ.

ރާނީ މިވަނީ ވަރަށް ފަހުން ބޮލީވުޑްގައި އޭނާ ކުރި ތަޖުރިބާއާއި އެ ދާއިރާގައި 27 އަހަރު ހަރަކާތްތެރި ވުމުގެ އިހުސާސްތައް މީޑިއާއަށް ކިޔައިދީފަ އެވެ.

ޓައިމްސް އޮފް އިންޑިއާއަށް ދިން އިންޓަވިއުއެއްގައި ރާނީ ބުނީ ބޮލީވުޑްގައި 27 އަހަރު ވީ ހެންވެސް ހީނުވާ ކަމަށާއި އަދިވެސް އަލަށް ފިލްމު ކުޅެން ފެށި ދުވަސްވަރު ކުރެވުނު އިހުސާސްތައް ކުރެވޭ ކަމަށެވެ.

" ފަހަތަށް ބަލާއިރު އަހަންނަކަށް ނުފެނޭ އަހަރެން އެކްޓަރަކަށް ނުވާންވީ ސަބަބެއް. އެކްޓަރަކަށް ނުވިނަމަ ދިރިއުޅުން އޮންނާނެ ގޮތް ޚިޔާލަށް ވެސް ނުގެނެވޭ" ރާނީ ބުންޏެވެ.

ރާނީ އިތުރަށް ބުނީ މިއަދުވެސް އޭނާއަކީ އާ ފިލްމުތަކާއި އާ ރޯލުތައް ކުޅެ ތަފާތު ތަޖުރިބާތައް ކުރަން ފެން ބޮވައިގަނެފައިވާ މީހެއް ކަމަށާއި އެފަދަ ފުރުސަތެއް ދޫ ނުކުރާނެ ކަމަށެވެ.

ރާނީ އެންމެ ފުރަތަމަ ބޮލީވުޑަށް ނުކުތީ 1996 ވަނަ އަހަރު ނުކުތް "ރާޖާ ކީ އާއޭގީ ބާރާތު"އިންނެވެ. އެއަށްފަހު އޭނާ ވަނީ "ކުޗް ކުޗް ހޯތާހޭ"، "ބުލެކް" އަދި "ކަބީ އަލްވިދާ ނާ ކެހެނާ" ފަދަ ފިލްމުތަކުގައި ފެނި އެވޯޑުތައް ވެސް ހާސިލްކޮށްފަ އެވެ.