އިންޑިއާގެ އިލެކްޝަން ކޮމިޝަނުންގެ "ނެޝަނަލް އައިކޮން"ގެ ޝަރަފު ބޮލީވުޑްގެ މަގުބޫލު ތަރި ރާޖްކުމާރު ރާއޯއަށް އެ ކޮމިޝަނުން އަރުވައިފި އެވެ.

ރާޖް ކުމާރު ރާއޯއަށް މި ޝަރަފު އަރުވާފައިވަނީ އެކަމަށްޓަކައި އިއްޔެ ބޭއްވި ހާއްސަ ހަފްލާއެއްގަ އެވެ. އެ ހަފްލާގައި ބޮލީވުޑްގެ އިތުރުން އިންޑިއާ ސަރުކާރުގެ އިސް ބޭފުޅުން ބައިވެރިވި އެވެ.

އިލެކްޝަންސް ކޮމިޝަންގެ "ނެޝަނަލް އައިކޮން"ގެ މައިގަނޑު މަސްއޫލިއްޔަތަކީ އެގައުމުގައި ބާއްވާ އިންތިހާބުތަކާ ބެހޭ މައުލޫމާތު އާއްމުންނަށް ފޯރުކޮށްދިނުމެވެ. އެއާއެކު އިންތިހާބުތަކުގައި ބައިވެރިވެ ވޯޓުލުމުގެ މުހިއްމުކަމާމެދު އާއްމުންގެ މެދުގައި ހޭލުންތެރިކަން އިތުރު ކުރުމެވެ.

އިލެކްޝަން ކޮމިޝަނުން ރާޖްކުމާރް ރާއޯ އެ ކޮމިޝަންގެ މޫނެއްގެ ގޮތުގައި ހަމަޖައްސާފައި މިވަނީ އަންނަ މަހު އިންޑިއާގެ އާއްމު މަޖިލީހުގެ އިންތިހާބުތަކެއް ބޯމަތިވެފައި ވަނިކޮށެވެ.

މިއީ މި ޝަރަފު ބޮލީވުޑްގެ ތަރިއަކަށް އެރުވި ފުރަތަމަ ފަހަރެއް ނޫނެވެ. މީގެ ކުރިން އާމިރު ޚާން އަދި ޕަންކަޖް ޓްރިޕާތީއަށް ވެސް "ނެޝަނަލް އައިކަން"ގެ ޝަރަފު ދީފައިވެ އެވެ.

ރާޖްކުމާރް ރާއޯއަކީ ބޮލީވުޑްގެ ކާމިޔާބު ފިލްމުތަކުން ފެނި ގިނަ ބައެއްގެ މެދުގައި މަގުބޫލުކަން ހޯދާފައިވާ ފަންނާނެކެވެ.