ބޮލީވުޑްގެ ކުރީގެ ސުޕަ ސްޓާ ރާޖް ކަޕޫރުގެ ނަމުގައި އުޒްބަކިސްތާނުގެ ވެރިރަށް ޓަޝްކެންޓްގައި ރެސްޓޯރެންޓެއް ހުޅުވައި ހިދުމަތް ފަށައިފި އެވެ.

އިންޑިއާގެ މީޑިއާތަކުން ބުނާ ގޮތުގައި އަލަށް ހުޅުވި އެ ރެސްޓޯރެންޓަކީ އިންޑިއަން ކުއިޒިންގެ ހުރިހާ ކެއުމެއް ލިބެން ހުންނާނެ ރެސްޓޯރެންޓެކެވެ.

ސެންޓްރަލް އޭޝިއާގެ ގައުމެއް ކަމަށްވާ އުޒްބަކިސްތާނަކީ ރާޖް ކަޕޫރަށް ސަޕޯޓުކުރާ މީހުންނާއި އިންޑިއާ ރައްޔިތުންވެސް ގިނަ އަދަދަކަށް އުޅޭ ގައުމެކެވެ.

ރާޖް ކަޕޫރަކީ 1960ގެ އަހަރުތަކުގައި ބޮލީވުޑްގެ ފިލްމުތަކުން މަޝްހޫރުކަން ހޯދި ފަރާތެކެވެ. ކަޅާއި ހުދުގެ އެ ޒަމާނުގައި ރާޖްގެ ހުށައެޅުންތަކަކީ ގިނަ ބަޔަކަށް ކަމުދިޔަ ހުށައެޅުންތަކެެކެވެ.

ރާޖްއަކީ ބޮލީވުޑްގައި ނަން މަޝްހޫރު އާއިލާއެއްގެ އެންމެ ފުރަތަމަ ބޮލީވުޑް ސްޓާރެކެވެ. އެ އާއިލާގެ މިހާރުގެ ޖީލުގެ ތެރޭގައި ރައްބީރު ކަޕޫރު ހިމެނެ އެވެ.