ބޮލީވުޑް އެކްޓްރެސް އައިޝްވާރްޔާ ރާއީއާއި އޭނާގެ ފިރިމީހާގެ އާއިލާ ކަމަށްވާ ބައްޗަން އާއިލާއާ ދެމެދު ގުޅުން ރަނގަޅު ނޫން ކަމަށް ދެކެވޭ ވާހަކަތަކުގެ އަޑުތައް އަނެއްކާވެސް ގަދަވެއްޖެ އެވެ.

މި އަޑުތައް މިފަހަރު ގަދަވެފައިވަނީ ނޮވެމްބަރު 1ގައި ފާހަގަކުރި އައިޝްވާރްޔާގެ އުފަންދުވަސް ފާހަގަ ކުރުމުގައި އެ އާއިލާގެ އެއްވެސް މެމްބަރެއް ބައިވެރިވެފައި ނުވާތީ އެވެ.

އައިޝްވާރްޔާގެ އުފަންދުވަހާ ގުޅިގެން ބޭއްވި ހަފްލާއެއްގައި އޭނާގެ އުފަން މަންމަގެ އިތުރުން ފެނުނީ ދަރިފުޅު އާރަދްޔާ ބައްޗަން އެވެ. ފިރިމީހާ އަބީޝޭކް ބައްޗަންއާއި އޭނާގެ އާއިލާގެ އެހެން މެމްބަރެއް ވެސް ފެނިފައެއް ނުވެ އެވެ.

އެ ހަފްލާގައި އާރަދްޔާ ވަނީ ފުރަތަމަ ފަހަރަށް އާއްމު ތަނެއްގައި ވާހަކަ ދައްކާފަ އެވެ. އޭނާ ވަނީ އޭނާގެ މަންމައަކީ ވަރަށް ހެޔޮ ރަނގަޅު މީހެއް ކަމަށް ބުނެފަ އެވެ.

މިއީ އައިޝްވާރްޔާއާއި ބައްޗަން އާއިލާގެ މެދުގައި މައްސަލަ ޖެހިގެން އުޅޭ ކަމަށް އަޑުއެރި ފުރަތަމަ ފަހަރެއް ނޫނެވެ. މީގެ ކުރިންވެސް އެކި ފަހަރުމަތިން އެފަދަ އަޑުތައް އަރާފައިވެ އެވެ.

2007 ވަނަ އަހަރު ކައިވެނިކުރި އައިޝްވާރްޔާއާއި އަބީޝޭކް ބައްޗަންއަށް އާރަދްޔާ ބައްޗަން ލިބުނީ 2011 ވަނަ އަހަރު އެވެ.