މިހާރު ކުރިއަށްދާ އިންޓަނޭޝަނަލް ފިލްމް ފެސްޓިވަލް އޮފް އިންޑިއާ އެވޯޑްސްގައި ހިންދީ ފިލްމީ ދާއިރާއަށް މާދޫރީ ޑިކްސިޓް ކޮށްދީފައިވާ އަގުހުރި ހިދުމަތްތައް ފާހަގަ ކުރުމުގެ ގޮތުން އޭނާއަށް ޝަރަފުވެރިކަމުގެ ހާއްސަ އެވޯޑެއް ދީފި އެވެ.

އެވޯޑާ ހަވާލުވުމަށްފަހު ވާހަކަ ދައްކަމުން މާދޫރީ ބުނީ ބޮލީވުޑްގައި އޭނާ މަސައްކަތް ކުރާތާ 38 އަހަރު ވެއްޖެ ކަމަށާއި އެކީގައި މަސައްކަތްކުރި ހުރިހާ އެންމެންނަކީ ވެސް އާއިލާގެ ގޮތުގައި ދެކޭ ކަމަށެވެ.

އައި.އެފް.އެފް.އައި އެވޯޑްއަކީ ހަމައެކަނި ބޮލީވުޑް ނުވަތަ ހިންދީ ފިލްމުތަކުގެ އެވޯޑެއް ނޫން ކަމަށާއި އެއީ އެ ފަންނަށް ނިސްބަތްވާ ހުރިހާ އެންމެންގެ ވެސް އެވޯޑެއް ކަމަށް މާދޫރީ އިތުރަށް ބުންޏެވެ.

މާދޫރީއަކީ 1990ގެ އަހަރުތަކުގައި ބޮލީވުޑްގެ ކާމިޔާބު ގިނަ ފިލްމުތަކަކުން ފެނިގެން ގޮސްފައިވާ ތަރި އެކެވެ. އޭގެ ތެރޭގައި "ދިލް"، "ހަމް އާޕްކޭ ހޭ ކޯން" އަދި "ސާޖަން" ފަދަ ފިލްމުތައް ހިމެނެ އެވެ.

54 ވަނަ އިންޓަނޭޝަނަލް ފިލްމް ފެސްޓިވަލް އޮފް އިންޑިއާ، އެގައުމުގެ ގޯއާގައި ފަށައިގެން ކުރިއަށްދާއިރު އެ އެވޯޑުގައި ބޮލީވުޑްގެ މަޝްހޫރު ގިނަ ފަރާތްތަކުން ދަނީ ބައިވެރި ވަމުންނެވެ.

ނުވަ ދުވަހަށް ދެމިގެންދާ އެ ފެސްޓިވަލްގައި ބޮލީވުޑް ފިލްމުތަކުގެ އިތުރުން އެހެން ބަސްތަކުން ހަދާފައިވާ ފިލްމުތައް ވެސް ބައިވެރިކޮށްފައިވެ އެވެ.