ބޮލީވުޑްގެ މަޝްހޫރު ތަރި ޕަރިނީތީ ޗޯޕްރާއާ ބެހޭ ގޮތުން ސޯޝަލް މީޑިއާގައި ދޮގު ވާހަކަތަކެއް ފަތުރަމުން ދާތީ އެކަން ނުކުރުމަށް ބައެއް ސޯޝަލް މީޑިއާ ފޭން ޕޭޖުތަކަށް އޭނާ އިންޒާރުދީފި އެވެ.

ވަކި ސަބަބެއް ހާމަނުކޮށް ޕަރިނީތީ ބުނީ އޭނާއާ އެކުގައި މަސައްކަތްކުރާ އެހެން އަންހެން ތަރިންނަށް ސަޕޯޓުކުރާ ފޭން ޕޭޖުތަކުން އޭނާގެ ނަމުގައި ދޮގުތަކެއް ފަތުރަމުން އަންނަ ކަމަށެވެ.

ޕަރިނީތީ އޭނާގެ އިންސްޓަގުރާމްގައި ކުރި ޕޯސްޓެއްގައި އިތުރަށް ބުނެފައިވަނީ އޭނާއާ ބެހޭ ގޮތުން ދޮގު ފެތުރުން ކުރިއަށް ގެންދާނަމަ އެ ފަދަ ފޭން ޕޭޖުތަކާ ދެކޮޅަށް ގާނޫނީ ފިޔަވަޅު އަޅާނެ ކަމަށެވެ.

"އެހެން ތަރިންނަށް ތަރުހީބު ދިނުމުގެ ގޮތުން އަހަރެން ބުނި ކަމަށް ބުނެ ބައެއް ދޮގުތައް ފަތުރަމުންދާ ކަން ވަނީ ފާހަގަ ކުރެވިފައި. އެކަންކަން އަހަރެން މިދަނީ ބަލަމުން އަދި ބޭނުން ޖެހިއްޖެނަމަ ރިޕޯޓުވެސް ކުރާނަން" ޕަރިނީތީ ބުންޏެވެ.

ފިލްމީ މަސައްކަތްތަކަށް ބަލާއިރު ޕަރިނީތީ ދެން އެންމެ އަވަހަށް ފެންނާނީ އިމްތިއާޒް އަލީގެ ފިލްމް "ޗަމްކީލާ"އިން ޑަލްޖީތު ޑޮސަންޖްއާއެކުގަ އެވެ.