ޝާހްރުކް ޚާންގެ ކުރިއަށް އޮތް ފިލްމު "ޑަންކީ" ރިލީޒް ކުރުމުގެ ކުރިން އާއްމު ކުރަމުން އަންނަ އެ ފިލްމުގެ ވީޑިއޯތަކުގެ ތިންވަނަ ބައި "ޑަންކީ ޑްރޮޕް 3" އާއްމު ކޮށްފި އެވެ.

ޑަންކީ ޑްރޮޕް 3 އާއްމުކޮށްފައިވާއިރު އެ ވީޑިއޯއިން ފެނިގެން ދަނީ އިންޑިއާ ދޫކޮށް އެހެން ގައުމަކަށް ދާން މަސައްކަތްކުރާ ހަތަރު އެކުވެރިންގެ މަސައްކަތެވެ.

އެ މަންޒަރުތައް ފެންނައިރު ބެކްގްރައުންޑުން މަޝްހޫރު ލަވަކިޔުންތެރިޔާ ސޯނޫ ނިގަމްގެ ރީތި ލަވައެއް އަޑުއިވެ އެވެ. "ނިކްލޭ ތޭ ކަބީ ހަމް ގަރް ސޭ" ނަމަކަށް ކިޔާ އެ ލަވައަކީ މިހާތަނަށް އާއްމުކުރި ޑަންކީގެ ދެވަނަަ ލަވަ އެވެ.

މީގެ ކުރިން ނެރުނު "ޑަންކީ ޑްރޮޕް 2"ގައި އެ ފިލްމުގައި ފެނިގެންދާ ފުރަތަމަ ލަވަ " ލުޓް ޕުޓް ގަޔާ"ގެ ބައެއް މަންޒަރުތައް ފެނެ އެވެ.

ޝާހުގެ އިތުރުން ވިކީ ކައުޝަލް، ތާޕްސީ ޕަންނޫ އަދި ބޮމާން އިރާނީ މުހިއްމު ރޯލުތަކުން ފެންނަ ޑަންކީގެ އޮފިޝަލް ޓްރެއިލާ ނެރެން ހަމަޖެހިފައިވަނީ ޑިސެމްބަރު މަހުގެ ހަތްވަނަ ދުވަހު އެވެ.