އާއްމުންގެ މެދުގައި މަގުބޫލު ބޮލީވުޑްގެ ޖޯޑެއް ކަމަށްވާ އަބީޝޭކް ބައްޗަންއާއި އައިޝްވާރްޔާ ރާއީގެ ކައިވެނީގައި މައްސަލަތަކެއް ޖެހި ދެމީހުން ވަރިވެފައި ކަމަށް ހަބަރުތައް ބުނެފި އެވެ.

މިފަދަ އަޑުތަކެއް މީޑިއާގައި ފެތުރެމުން ދަނިކޮށް ދާދި ފަހުން އަބީޝޭކް އާއްމުކޮށް ފެނުނުއިރު ފާހަގަވި އެއް ކަމަކީ އޭނާގެ އިނގިލީގައި ކައިވެނީގެ އަނގޮއްޓި ނެތް ކަމެވެ.

އެހެން ކަމުން ގިނަ ބަޔަކު އަންނަނީ އެކަމުން ވެސް އަންގައިދެނީ އެ ދެތަރިންގެ ކައިވެނި ނިމުމަކަށް އައިސްފައިވާކަން ކަމަށް ބުނަމުންނެވެ.

މީގެ އިތުރުން އައިޝްވާރްޔާ ވެސް އާއްމު ތަންތަނުން މި ދުވަސްވަރު ފެންނަނީ އަބީޝޭކްއާ ނުލާ ކަމަށް ވުމާއެކު ވެސް މި އަޑުތަކަށް އިތުރު ބާރެއް ލިބެ އެވެ.

މީޑިއާގައި މިފަދަ އަޑުތަކެއް ފެތުރެމުން ދިޔަ ނަމަވެސް އެ ދެމީހުންކުރެ އެކަކު ވެސް އެ އަޑުތަކަށް ޖަވާބުދާރީވެ އެކަން ޔަގީންކޮށްދީފައެއް ނުވެ އެވެ.

2007 ވަނަ އަހަރު ކައިވެނިކުރި އަބީޝޭކްއާއި އައިޝްވާރްޔާގެ ކައިވެންޏަށް 16 އަހަރުވިއިރު އެ ކައިވެންޏަށް 2011 ވަނަ އަހަރު އަންހެން ދަރިއަކު ލިބިފައިވެ އެވެ.