1960 އާއި 1970ގެ އަހަރުތަކުގައި ބޮލީވުޑްގެ މަޝްހޫރު ގިނަ ފިލްމުތަކަކުން ގިނަ ބައެއްގެ މަގްބޫލުކަން ހޯދި ކުރީގެ ކޮމީޑިއަން މެހެމޫދު ޖޫނިއާ ކެންސަރުގެ ބައްޔާ ހަނގުރާމަ ކުރަމުން އަންނަކަން ހާމަވެއްޖެ އެވެ.

އެ ހަބަރު އާއްމު ކުރަމުން މެހްމޫދުގެ ގާތް ރަހުމަތްތެރިއަކު ބުނީ މެހްމޫދުއަށް ޖެހިފައިވަނީ ޕުއްޕާމޭގެ ކެންސަރު ކަމަށާއި މިހާރު ހުރީ ސްޓޭޖް ހަތަރެއްގައި ކަމަށެވެ.

މީގެ އިތުރުން ވެސް ގޮހޮރުގައި ޓިއުމަރެއް ހުރުމާއި ރީނދޫވުމުގެ ސަބަބުން ދެ މަހެއްހާ ދުވަސް ވަންދެން ވަރަށް ސީރިއަސްކޮށް އޮތް ކަމަށާއި ޑޮކްޓަރުން އުއްމީދުވެސް ކަނޑާލާފައިވާ ކަމަށް އެ އެކުވެރިޔާ ބުނެ އެވެ.

އެހެން ނަމަވެސް މެހެމޫދު މިހާރު އަންނަނީ އެ ބަލިތަކަށް ފަރުވާ ކުރަމުން ކަމަށާއި ބޭނުންވަނީ އެންމެންގެ ވެސް ހެޔޮ ދުއާ ކަމަށް އޭނާ އިތުރަށް ބުންޏެވެ.

މި ހަބަރާއެކު އާއްމުންގެ އިތުރުން ބޮލީވުޑްގެ ބައެއް ތަރިން ވެސް އަންނަނީ ހިތާމަ ފާޅު ކުރަމުންނެވެ. އެގޮތުން ކޮމީޑިއަން ޖޮނީ ލިވާ ވަނީ މެހެމޫދުގެ ކައިރިއަށް ޒިއާރަތް ވެސް ކޮށްފަ އެވެ.

މެހެމޫދު ވަނީ އެކި ބަސްބަހުން 200 އަށްވުރެ ގިނަ ފިލްމުގައި ހަރަކާތްތެރިވެފަ އެވެ. އޭނާގެ އެންމެ މަޝްހޫރު ފިލްމުތަކުގެ ތެރޭގައި ކަޓީ ޕަތަންގް އާއި މޭރާ ނާމް ޖޯކަރު ހިމެނެ އެވެ.